Shillong, Jymmang 08: Ka jingshah siat ïap u Bah Roning Nongkynrih ha ka ktang suloi ki BSF ka la pynlong ïa ki kynhun seng bhalang na kylleng ka ri bad khamtam eh na ki thaiñ Pynursla bad ka Dorbar Shnong Jalynteng ka shnong jong u Bah Roning bad kumjuh ka Dorbar Shnong Pomshutia ban pynrem jur bad dawa ba ki BSF ki dei ban shah pynshitom namar ka kam pynïap briew jong ki.
“Kum ka seng ngin bud dien ïa kane ka kam bad ngin leit tied jingkhang sha ka Meghalaya Human Right Commission ban dawa ba dei ban pynïoh ïa ka jingbishar ba hok ïa une u rangbah ba shah pynïap ha ka kti ki riew thrnag snam phong uniform,” ong u President ka Riwar Mihngi Development Organization u Bah Donlang Nongbri.
“Ha kano bynta jong ka riti synshar ka ri ba la ai bor ba dei ban siat ïap beit ïa uba suba riewbymman bad nga kwah ban ai kane ka khubor kaba shai sha ka sorkar India ba kynmaw ba ki mynsiem briew jong ka dong ka thaiñ kim dei ki mrad ba ki lah ban shu siat ïap katba ki mon bad wat pyrshang ban shim kabu ïa ka jingjaijai jong ngi ïoh kan klang ka ding,” u la maham.
“Ka sorkar ka dei ban kem mardor ïa kito ki BSF kiba don kti lem kumta ka seng kan shim da ki sienjam kiba tyngeh da lade,” ong u Assistant General Secretary ka KSU South Central Circle u Bah Vorrozislov Sohkhlet haba kren sha ki lad pathai khubor.
Shuh shuh na ka liang ka Dorbar Shnong Jalynteng lyngba u Secretary u Bah S Khongsngi u la ong ba kane ka jingsiat ïa u Bah Roning ka la dei bei beit ka jingpynkheiñ ïa ka hok longbbriew man briew namar la shu siat khlem da ïa shuwa kino kino ki jingmaham.
“Lada dei ba ki dei ki nongkhaïi tuh bad ki nongkit masi kumba ki kynnoh ki BSF kim donhok ban siat ïap hynrei kat kum ka aiñ dei ban kem ïa ki bad da leilei ngin ym lah ban pdiang ïa kane,” ong u Rangbah Shnong ka Pomshutia.
“Ngi dawa ba ki BSF bad ka sorkar ba ki dei ban pynbiang ïa ki jingdonkam ki khun jong u Bah Roning haduh ba kin da ïohkam bad ba dei ban siew bai lutksan ïa ka jingpyniap briew jong ki bad ngi dawa ba dei ban ai jingsaja kaba tyngeh ïa ki nongpynïap,” ong u President ka HITO Pynursla Circle u Bah I. Khongtani.
