Shillong, Jymmang 08: U Myntri Rangbah ka Jylla Conrad K Sangma, ha ka sngi Nyngkong, u la ïathuh ba u la pan ïa ka kaiphod ba pura halor ka jingsiat ïap ki shipai BSF ïa u Bah Roningstar Nongkynrih ha ka miet sngi Thohdieng hapoh ka shnong Mawshun, Pynrusla.
Haba ïakren bad ki lad pathai khubor, u Myntri Rangbah u la pyntip ba na ka liang jong u u la bthah ïa u Investigation Officer (IO) ban wad ïa ka jingshisha bad ban aiti ïa ka kaiphod ba pura halor kane ka jingjia.
“Khlem da ïoh ïa ka kaiphod ba bniah bad ka kaiphod ba thikna, kam long satia kaba dei ban kynthoh halor kane ka jingjia” u la ong.
“U symbud Myntri Rangbah (Prestone Tynsong) ula pan ïa ka kaiphot bad dei ma u uba lah ban ai jingtip kaba bniah,” u la bynrap.
Lah ban kdew hangne ba ki shipai BSF kila siat ïap ïa u Bah Roningstar Nongkynrih uba dei u nongñiah trok halor ka jingkynnoh ba u donkti ban kit ïa ki masi bad shalan be-aiñ sha Bangladesh.
Kat kum ka jingïathuh kiba ha ïing ba ki BSF ki la siat haduh lai kuli ha ka kali kaba u ñiah bad uwei u kuli u la dei na ki bynta ka ryndang bad sam lyngba pat sha ki bynta jong ka khlieh.
