Nongpoh, Lber, 23: Kiba bun ki nongrep ha ka thaiñ Umroi ki la her mynsiem mynta ka sngi u Blei, kaba dei hadien ba u phria u la ther kynsan ha ka thaiñ Umroi kaba la buh jingma ïa ki jingthung jingtep ha ki pynthor bad ki lyngkha ba ki nongrep ki rep ïa ki jingthung jingtep.
Haba ïoh ban lum jingtip, u phria mynta ka janmiet u la ther kynsan ha ka por 3 baje ei ei janmiet ha k thaiñ Umroi bad Umïam haduh ba ki madan ki la lieh shaid da u phria uba la hap bad neh kumba katto katne minit.
Haba pynkynmaw, kane ka jinghap phria ryngkat ka lyer ka la jia ruh hadien ba ka Indian Meteorological department ka la dep pynbna lypa ba ka lah ban don ka jingkhie eriong bad hap phria na ka jingkylla ka suiñbneng ka ban ktah ha ki katto katne ki bynta jong ka Northeast India ba ka lyer bajer ka wan beh na ka bynta jong ka Bay of Bengal.
Haba wad jingtip halor kane ka jinghap phria, la ïathuh ba u phria u la neh kumba katto katne por, ha kaba la suba kane ka jinghap phria ka lah ban ktah ïa ki jingthung jingtep ki nongrep. La sakhi ruh ba ki madan bad ki ïing ki sem ki la lieh shaid na ka jinghap phria.
La ïathuh ruh ba kane ka jinghap phria ka lah ruh ban ktah ïa ki katto katne ki longïing kiba don ïa ki ïing ki sem kiba ym da skhem ka tnum ïing bad khamtam kito kiba la sarang ka tin, ba u phria u lah ban pynjot ïa ki tnum ïing. Kane ka jinghap phria ka lah ruh ban ktah ïa ki jingthung jingtep ha kaba kane ka aiom bun ki nongrep ki la dep ban rep bad la jan dei ka por ba kin ïoh jingmyntoi.
Kumba la pynpaw da ki nongrep, ki jingthung jingtep kiba ki rep ha kane ka por ki kynthup kum ïa u sohsaw, ki sohmynken, ki salat, presbin, kajor bad kiwei kiwei ki mar rep ba kane ka jinghap u phria ka lah ban pynjot ïa kitei ki jingthung jingtep ba la rep da ki nongrep ha ki pynthor bad ki Lyngkha rep jong ki.
