Shim jingkitkhlieh ka Hima ban pynkhuid ïa ka ïewduh, bthah ïa ki nongthied nongpet ban leh khuid

Shillong, Lber 23: Kumba ju long manla u snem ka Hima Mylliem bad ka Executive Dorbar baroh kawei ha ka sngi U Blei ka la pynkhuid ïa ka Ïewduh ha kaba ha kane ka jingpynkhuid ïa ka Ïew la synran lang da u Myntri War Tynghah uba khmih ïa ka tnat ka Khuid ka Suba (Sanitation) bad kumba 60 ngut ki nongtrei ka Hima kiba ju pynkhuid ïa ka ïew manla ka sngi bad kumjuh ruh kiba shong dukan hapoh Ïewduh.
Ha kane ka sngi la ïohi ba ki nongtrei ka Hima bad kiba shong dukan ki la sei lut ki jaboh jabaiñ kiba la set ïa ki nala bad kumjuh ruh ki la ïoh ban kit shibun bah ka ñuit napoh ka Ïew baroh kawei.
Wat hapdeng ka jingpyrshang jong ka Hima ban bthah ïa kiba shong dukan ban long kiba leh khuid hynrei dang don pat katto katne kiba shong dukan ki bym suitñiew kiba la bret ïa ki ñuit ha ki nala kiba la long pat ka daw jong ka jingset ka jaboh ïa ki bad ba ka um kaba jaboh ka tuid pat sha ki lynti ïaid na ka daw jong ka jingset kitei ki jaboh.
Haba kren bad u nongthoh khubor u Myntri War Tynghah u la ong ba kane ka dei ka kam kaba ju leh manla u snem ban pynkhuid, ban sar bad kumjuh ruh ban synreit da ka um ïa ki basa kiba kham jaboh bha kum ka Basa Dohkha, ka Basa doh bad kumjuh ruh sha ki nala kiba don ha them Ïew Mawlong bad kiwei ki Basa.
“Mynta ka Ïew ka la kham khuid namarba kiba shong dukan ruh ki la buh ïa ki jaka theh ñuit hakhmat ki dukan jong ki, hynrei kane kam pat biang namar dang don kiba bret ñuit pathar khamtam eh kiba wan thied jingthied na shabar kiba rung hapoh Ïewduh. Ngi pynkhuid ïa ka Ïew manla u snem namar lada ngim leh kumno kiba shong Ïew kin ong. Ka dei ka kamram jong ka Hima ban pynkhuid ïa ka Ïew bad ngim ju shim pisa na kiba shong dukan haba ngi pynkhuid ïa ka Ïew, hynrei la pynlut hi na ka Hima nadong shadong,” ïathuh u Myntri.
U la ong ba la ju leh manla u snem namarba ki paidbah ruh ki khmih lynti ba ka dei ban don ka jingpynkhuid ïa ka Ïew bad nalor ba la pynkhuid ïa ka Ïew la bthah ruh ïa kiba shong Ïew ba kin leh khuid leh suba bad haba pynkhuid ïa ka Ïew ka long ka jingmyntoi shibun namar la ïoh ban synreit da ka um da ka firebrigade, nangta la ber sa ka shun khnang ba ka Ïew kan lait na ki jingboi skaiñ, ka jingsma, ban lait na ka jingblok ki nala, ka jingbun ki pipe ruh ka dei kawei ka daw ba sahkut ki ñuit bad dei halor kane ba ka Hima ka shim ka jingkitkhlieh khnang ba kan wanrah ruh ka jingkoit jingkhiah.
“Haba ngi pynkhuid ïa ka Ïew ngi leh hi na ka Hima ym don kiba ïarap, wat ka um ba ngi synreit ruh ngi hap ban thied, bad kiba ïarap lang ban pynkhuid dei ki 60 ngut ki nongtrei ka Hima kiba kit ïa ka ñuit ban leit theh hapoh ka trok kit ñuit ka Hima,” ïathuh u Myntri da kaba pyntip ba ka Hima ka don tang 4 tylli ki trok kit ñuit.
U Myntri u la ïathuh ba manla ka sngi kumba 5 trok ka ñuit ka mih napoh Ïewduh bad don ki sngi ruh ba ki trok kin hap ban wan biang ban kit ïa ki ñuit bym pat dep kit lut bad mynta ka ïew ka la pher bha ban ïa kaba ju long mynshwa namar ka la kham khuid namar ba u Syiem ruh u la shim khia bha halor ka khuid ka suba jong ka Ïewduh.
“Na ka bynta ka jingkhuid ka ïew ngi la bthah ïa kiba shong ïew ban buh ki jaka bret ñuit, haoid ki la leh ïa kane, hynrei teng teng kiba wan Ïew nabar pat ki bret pathar, kumta nga kyntu ruh ïa kiba wanthied jingthied ha ïewduh ba kin ym bret pathar hynrei bret ha kito ki dusbin ba la buh da kiba shong dukan namar kane kadei ka pliang ja jong ki ruh, ym tang ïa kiba shong Ïew,” kyrpad u Myntri.