La pyllait paidbah ïa ka kali Wheelchair ban pynsuk ïa ki nongpang bym lah ban ïaid

Shillong, Lber 23: Ka Physical Medicine & Rehabilitation (PMR) Centre kala wanrah nyngkong eh ha ka thaiñ shatei lammihngi ïa ka Wheelchair-Accessible Vehicle ha Shillong, da ka jingthmu ban pynsuk ïa ka leit ka wan jong ki briew kiba don jingduna ha ka dkhot met ne kiba shem shitom ban ïaid na ki jingpang ba ha rukom.
Ka Dr. Lahunlang M. Sohliya, Director jongka PMR Centre, kala pynshai ïa ka jingthrang kaba la don halor katei ka jingthmu, da kaba pynpaw ïa ki jingeh kaba la mad da ki riewshimet kiba don jingduna ha ki dkhot met.
“Kiba bun ki nongpang ki shem jingeh ban leit shim dawai ne ban leit sha ki ïingmane ne ban leitkai sha ïing ki paralok. Kala ktah bha ïa ka jinglong ha ka met ka phad ka jongki bad ïa ka bor pyrkhat ka jongki, kaba lam sha ka jingsngew marwei. Kane ka dei kata ka jingmut jingpyrkhat kaba la mih” kala batai.
Ka kali Kia Carens ka ngiam haduh 6 ngut kynthup ïa kawei ka kali Wheelchair. Ka bynta kaba kongsan ka dei ka jingdon ïa ka ‘Ramp’ kaba ar mitar ban pynsuk ïa ka jingpynrung ïa ka Wheelchair ïa kaba lah ruh ban teh, ki seat belt ïa baroh kiba shong hapoh ka kali bad ka jingkylluid ka jaka ban pynthikna ïa ka jingsuk kiba shong hapoh ka kali.
Ka Dr. Sohliya kala pyntip ba ïa kane ka projek la lah ban pynurlong lyngba ka jingïoh ïa ka grant na ka PRIME Meghalaya bad ka jingkyrshan jong ka Myntri ka koit ka khiah ka Dr. Ampareen Lyngdoh. Nalor katei ka jingnoh synniang, la pynlut ruh nalade ban pyndep ïa ka jingshna pynbha ïa ka kali.
Ka la banjur ba kane ka kali kadei tang ka jingsdang, “Lada shem ba ka long kaba ai jingmyntoi bha, ngi ngeit skhem ba ka sorkar kan ai ïa ka jingithuh bad kan pynïar shuh shuh ïa ka. Nalor ka jingleit jingwan, ngi kwah ruh ban shimkhia ban lah ban pynpoi sha ki jaka mane Blei, ki jaka ha ka imlang sahlang bad ki jaka bam” ka la ong.
Kumba long mynta, ki nongshong shnong ki lah ban ïoh pyndonkam ïa katei ka kali da kaba phone ha u 708-523-5036. Ka jingthmu ban buh ïa ka Application ne ka App ka dang don ha ka jingpynkhreh bad ka don ruh ka jingthmu ban shim ha ka dor kaba biang ban pyndonkam ïa kane ka kali, khnang ban pynthikna ba kin kot bor.
Ka Rinalin Nongdhar kaba pyndonkam ïaka Wheelchair na ka Bethany Society, kala pynpaw ïa ka jingsngewnguh, “Kane kadei ka sienjam kaba khraw ban pynsuk ïa ka leit ka wan. Ka dei ka jingpynkup bor ïa ki briew kiba kum ma ngi. Nga ai khublei ïa ka Dr. Sohliya bad ïa ka iing ka sem jongka halor kane ka sienjam”.
Nalor kane, kala pynpaw ruh ïa ki jingeh ha ka leit ka wan ha ka nongbah Shillong, ïa ka jingdon ïa ki surok ki bym shngaiñ bad ka jingbym ïoh pyndonkam ïa ki lynti ïaidkjat (footpath).
“Lada ka sorkar ka pyntreikam ïa ki lynti iaid kjat kiba lah ban pyndonkam, kan pynkylla ïaka jingshem ka jong ngi” kala ong.
Ka Dr. Sohliya bad kiwei kiwei kiba la ïadonlang, kila banjur ïa ka jingdonkam ka sorkar ban shim ïa ki sienjam halor katei ka bynta.
“Katba kiwei pat ki jylla kum ka Delhi bad Bangalore ki don ïa kum kitei ki kali, ngi lah ban ïeng ban pynbha shuh shuh ïa ka leit ka wan, khamtam na ka bynta ki nongjngohkai kiba don jingduna ha ka dkhot met. Kane kan kyntiew ïa ka dur ka jong ngi kum ka jylla kaba pdiang sngewbha”.
Ha kane ka jingïalang la wan ban ïashimbynta da ki nongmihkhmat na ki kynhun bapher bapher kiba kynthup ruh ïa u kongsan u Rev. Dr. R.R. Cunville bad Rev. Terence Wanshong uba la shah khot kyrpang, kiba la ai ka jingïaroh ïa kane ka sienjam.