Hato shu thok u Conrad ban kyntiew ïa ka dewlynnong Nongkhnum?

Nongstoiñ, Rymphang 8: Ka Hynñiewtrep Youths Council (HYC) bad ka Hynñiewtrep Achik National Movement (HANM) West Khasi Hills District mynta ka sngi, ha ka jingïalam u Samla Wanteibok Lyngdoh General Secretary HYC bad u Samla Willstone Sohshang President HANM West Khasi Hills, ki la leit ïa kynduh ïa u Deputy Commissioner West Khasi Hills District, ryngkat ka jingthoh ban kylli ha kaba ïa dei bad ka jingkular u Chief minister jong ka jylla Meghalaya ha ka 15 tarik u Naiwieng 2021, na ka bynta ban pynbha ïa ka Dewlynnong Nongkhnum kaba don ha West Khasi Hills.
Lah ban kdew ba kane ka Dewlynnong Nongkhnum ka wan ba ar ka jingheh ha Asia bad u Conrad u la kular da ka song 13 klur lyngba ka ram kaba la ïoh na ka International New Development Bank, ba la bei da ka Brick kaba dei ka kynhun jong ki ri ka pyrthei kaba kynthup ïa ka China, Russia, India, South Africa bad Brazil, ba ka Sorkar Meghalaya ka mut ban shim haduh 700 klur ban pynbha ïa ki jaka jngohkai ha Meghalaya.
Ha kane ka jingïakynduh na ka liang u Deputy Commissioner Garod L.S.N Dykes, u la ong ba um don jingtip ei ei halor kane ka bynta. Namar kane ka lah kham slem. Na ka liang jong u, u dang wan shimti dang shiphang, kumta um tip bha tangba u la kular hakhmat kine ki nongïalam, ba un sa phah da jingthoh ha ka Tourism Department halor kane ka bynta. Kumjuh un sa phah da ka jingthoh halor kane ka bynta sha kine ki Seng kumno ka la ïaid mynta.
Kumta halor kane na ka liang jong kitei ki ar tylli ki Seng ki la ong ba lada ym pat pyntrei ne pynbha ïa katei ka Dewlynnong, ka Department ka dei ban pynkloi noh ban trei ne pynbha noh kumba katkum katei ba la mang, khnang kan ai jingmyntoi ïa ka dong ka thaiñ kumjuh ïa ki nongshong ki shnong ba marjan jong katei ka jaka. Kumba long mynta ka kam jngohkai ka dei kawei na ki lad ban ai kam ïa ki briew bad kan kyntiew ïa ka dong ka thaiñ kumjuh ïa ka jylla.