Nongstoiñ, Naiwieng, 07: Ha u snem ba la dep ka sorkar ka la kular ban shna noh ïa ka surok na Nonglang sha Mawrok, hynrei haduh mynta ym pat ïohi dak ei ei, ong u bah Phransis Wanniang uwei na ki riew rangbah na ka shnong Kyndongei.
U bah Wanniang haba ïakren bad u nongthoh khubor, u la ong ba na ka bynta katei ka surok, ka sorkar ka la phah ruh ïa ki briew ba kin leit sorbe bad la ïoh jingtip ruh ba ka phase ba nyngkong ba la dep ban sorbe ka dei kumba shiphew kilomitar kata na Nonglang sha madan Umit.
Nalor kata u la ong ruh ba ki la don kiba ïathuh ha u ba la dep mang pisa ruh kumba arphew klur tam na ka bynta ban shna ïa katei ka surok, hynrei ym tip balei ba ka sorkar ka la shu sngap jar jar haduh mynta.
U bah Wanniang u la ong ruh ba ha ka jingshisha katei ka surok ka dei kaba donkam haduh katta katta, namar na Rambrai sha Mawrok ka la don ka surok PMGSY bad lada la don sa ka surok na Nonglang sha Mawrok, ka la long ka jingmyntoi kaba khraw ïa ki paitbah ha ka leit ka wan ka kit ka bah.
Kumba long mynta ki nongshong shnong naduh Nonglang Langja, Kyndongei, Mawkapiah, Kyrdum, Umwahlang, Mawsikar haduh Langpih, ki don kiba haïing hasem ha Mawrok, Rambrai, Mawkhiat haduh Mawdoh. Hynrei haba ki leit donkam ki hap ban leit shuwa sha Nongstoiñ sha hiar sha Rambrai, Mawrok, Mawkhiat haduh Rynñiaw.
Ka jingjngai na Nonglang sha Mawrok lyngba ka Nongstoiñ bad Rambrai ka la poi hynriew phew lai kilomitar. Katba lada don surok Nonglang sha Mawrok pat ka jingjngai ka long tang kumba khat lai kilomitar ei ei. Kumta ka sorkar ka la dei ban pyrkhat lem na ka bynta ka jingmyntoi jong ki paitbah.