Hapdeng ka jingkyrduh kam ki Samla, haduh 7653 ki post ba thylli khlem pyndap ka sorkar

Shillong, Risaw 21: Watla kiba bun bah ki samla kiba la nang la stad ha ka jylla kiba shong khlem kam khlem jam hynrei na ka liang ka sorkar jylla kam shym la pushe ban pyndap ïa 7,653 tylli ki post kiba thylli naduh u snem 2018 ha kiba bun bah ki tnat jong ka, ïa kane la lap da u Bah Disparsing Rani u nongwad RTI bna nam ha ka jylla.
Ha ka jingïakren sha ki lad pathai khubor u Bah Dispar ba kat kum ka jingwad jingtip kaba u ïoh, la lap ba ki post kiba thylli bad kiba ym shym pat la pyndap ka dei naduh u snem 2018 ter ter bad kane ka kynthup ha ka tnat ka koit ka khiah 749, Water Resources 183, Directorate of Stastistic 133, Directorate of Agriculture 35, Directorate of Holticulture 31, Directorate of Soil& conservation 226, directorate of Commerce and Industry 133, Directorate of Printing, 144, Dir4ectorate of Sports 30, PWD 280, Education 26, Directorate of Sericulture 202, Meghalaya State Rural Livelihoods Society 90, C&RD 16, Forest 276, MeECL 2320, Urban Affair+MUDA 55, DC Nongstoiñ 30, Police Department 2477 khlem kynthup ïa kaba lait ha DGP Office 46 bad 2nd Battelion West Garo Hils 169, Meghalaya Government Construction Corporation 19, DC South West Khasi Hills 3 ha kaba lada kheiñ lang baroh kiba lait ki long 7,653 tylli.
“Lada ïa kine ki post kiba la dep sanctioned ha kaba ka pisa ruh la don lupa ka sorkar kam shym la pyndap hato ngi lah ban khmih lynti ba ïa ki post thymmai lei kan pynmih bad ïa kane ka pisa ba la mang lupa ruh shaei ka leit,” la buh jingkylli u Bah Disparsing ïa ka sorkar.
U la ong ruh ba ym tang ba ka sorkar kam pyndap ïa ki post kiba thylli hynrei ka song pisa ha ka dur ka ram bad ki subsidy ruh ka duna bha sha kito ki samla kiba kwah ban ieng ha la ki kjat ban seng kam lajong kiba ïoh mynta ki don tang kumba 1005 ngut eiei.
Shuh shuh u na ka liang jong u u la khot la wer lang ïa ki samla bad ki paidbah baroh ban ïaid rali lang bad ka seng FKJGP ha ka 28 Risaw na Motphran sha Madan Ïewrynghep ban dawa ïa ka jingpyndap ïa ki post kiba thylli bad ban ïarap bai seng ïa ki samla kiba seng kam lajong.
U la ong ruh ba ha ka jingshisha lada ka sorkar ka wad lad wad lynti ïa ki samla, kiba bun bah na ki kin im ja na ka kam lajong lyngba ka khaïi pateng bad ka ri Bangladesh, ka kam jngohkai pyrthei bad kiwei ki lad kamai.
Haba kren halor ka jingkam ka sorkar ba kam don pisa ban leh ïa kiba bun ki kam pynroi , u Bah Disparsing u la ong ba ka daw hi ka dei namar ka sorkar kam don ka thong ban wanrah pisa sha ka pla jong ka bad kam teh lakam ïa ka jinglait tuh ka pisa da ki bun bun klur ha ka shisngi.
“Wat ka Ïingbishar Meghalaya High Court ka tip bha ïa kane namar lada peit ha ka rai bishar ba dang shen ka la maham tyngeh ruh ïa u chief Secretary bad u DGP ba kim dei ban nguh bad dem ha ki Politician hynrei ban kem naphang ïa ki kali kit dewiong. Kane ka rai ka ïingbishar ka pyni shai ba ka la tip thikna ba ka don ka jinglait ka khajna da ki bun bun klur’ u la ong.
U la ong ruh ba lada peit na ka jinglong jingman ha ka sorkar la ïohi ba ka don ruh ka jingïapyni bor hapdeng ki party ba don lang ha ka kaba wanlam pat ïa ka jingijah burom ïa ka sorkar.
“Lada phi peit bha kaei kaba jia ha ka jingïakhih ki nonghikai, u Bah Lahkmen Rymbui u ong ban siew tulop nonghikai bad ban kyntiew ka sorkar kam don pisa u Myntri Rangbah pat u don pisa bad kane ka pyni ka don ka jingïatan tyllai para ma ki bad ka jingpyni mano ba kham khlaiñ bor,” bad bynrap “ka mang tyngka ha kane ka sorkar ba mynta lei kam long kaba beit bad kaba ryntih (Planned budget) bunsien ka pisa kaba la mang na kaei ka tnat la shu rah sha kawei ka tnat bad kane kam pat ju jia ha ka sorkar u Mukul na kata ka daw kaba ïadei bad ka jingpynïaid ïa ka pisa tyngka ka kham tbit ka sorkar Congress kaba ïalam u Dr Mukul” ula ong.