Na Mawsynram sdang ka MACC ban ïalap ïa ka jingjied MLA da ka lynti kaba khuid

0

Shillong, Risaw, 21: Katto katne ngut ki samla rangbah hapoh ka kynhun Meghalaya Awaken Concern Citizen (MACC) kiba don ïa ka jingthmu bad ka jingangnud ban pynsngewthuh sha ki paidbah ban jied ïa ki Nongmihkhmat sha ka Ingdorbar Thawaiñ da ka lynti kaba khuid ha ka sngi Palei ki la hiar ban sdang ïa kane ka jingïalap kaba nyngkong eh ha ka shnong Mawsynram, East Khasi Hills District.
Kane ka kynhun ba la synran lnag da ki nongïalam jong ka Awakening India Movement, Meghalaya State Unit lyngba ka Clean Political Campaign ka la pynshai sha ki paidbah jong ka thaiñ halor ka hok bad ka nongkynti kumno ban long ki nongthep vote kiba khuid shwa ka elekshon ka ban sa long ha u snem 2023.
Ki nongïalam jong ka MACC ki la pynshai sha ki paidbah ban pyrkhat janai na ka bynta ban wanrah ïa ka jingkylla kaba bha lyngba ki paidbah nongthep vote ba ym dei ban die duh ïa ka vote sha ki Politician ki ban ieng ïakhun na ki Political Party bapher bapher bad ban pynshai kumno ban jied ïa u ne ka Nongmihkhmat ba janai na bynta ban wanrah ïa ka jingkylla bad ban kyntiew ïa ka shnong ka thaw na ka bynta ka lawei ka ban sa wan.
Watla ka MACC ka la wer ïa ki kyrtong jong ki seng saiñpyrthei ban ïashim bynta lang ha kane ka sngi, hynrei dei tang u Bah Gopalstone Hynñiewta u kyrtong ka seng Congress na Mawsynram Constituency u la don ryngkat haduh ba la wai ka jingïalang.
U Bah Charli Mawlieh na ka shnong Nongstoiñ, u la pynsngew sha kiba bun balang ba dei ban long ki briew kiba ïohi jngai na bynta ka hok kaba donkam kum ki nongthep vote ha la ki jong ki constituency. U la ong ba ka jingjied ïa u ne ka kyrtong ban long ki MLA ka shong eh ha ka rai jong ki nongthep vote shimet ïano ban jied ha kaba yn ym don ba lah ban pynbor ne wat ban die duh ïa la ka vote tang namar ka pisa.
U la kyntu ïa ki paidbah ba ki dei ban long kiba husiar bad ban kiar noh na ka jingbiej tyngka ka ban kylla long kum ka lad khaïi ym shuh ka ban wanrah jingkhuid hapdeng jong ki nongshong shnong kiba la don ryngkatlang bad u MLA.
U kyrtong ka seng Congress Bah Gopalstone Hynñiewta haba kren ha kane ka jingïalang u la ai jingïaroh ïa ka MACC kaba la pynlong ïa kane ka jingïalap ban pynshai sha ki paidbah halor ka hok bad ka jingshisha kumno banlong ki nongthep Vote bym shah thied ha ka bor pisa.
U la ong ba kane ka kynhun ka long shisha kaba donkam na bynta ka hok kum ki paidbah nongthep Vote ba ki dei ban don namar kam dei ka kynhun ka ban ïalap ne pyrta elekshon ne wat ban kynthoh ïano ïano ruh bad tang kawei ka lynti kaba la ïaid kum ka kynhun ka long beit ba kumno ki paidbah ki ïaid halor ka lynti kaba khuid ha kaba jied Nongmihkhmat.
U Bah Hynñiewta um shym la pan jingkyrshan na kane ka rynsan, hynrei kum u kyrtong jong ka seng Congress u don ka jingangnud ban ïohi ïa ka jingkylla na ki paidbah bad kaba kongsan ka long ba ki dei ban da bishar bniah ïa ki kyrtong ban ïakhun elkekshon la ki ibit neem ban shah jied kum ki nongmihkhmat ha ka kane ka kynti.
U Bah Banshai Marbaniang uba long u nongïalam ka Meghalaya Awaken Concern Citizen (MACC), u la banjur ïa ki paidbah jong ka thaiñ baroh kawei ba ym dei shuh ban shu pynlong kamkai ïa ka nongrim bad u kyntu jur ruh ïa ki paidbah ba kin long kiba ïohi jngai da kaba peit bniah ba katne ka jingsakhi halor ka jingjot jingpra jong ka Jylla na ki MLA kiba long ki Nongmihkhmat bad Myntri Sorkar ha kane ka samoi san snem ba mynta ka la pynhiar dor ïa ka jylla ha kiba bun ki liang kynthup naduh ka kamai kajih jong u duk u rangli, ki lad ïohkam ïohjam jong ki samla, ka jingshah pynduh jong ki mar rep bad ki marpohkhyndew kiba mih hapoh la kajong ka thaiñ, ka jinghiar arsut ka pule puthi bad kiwei kiwei de ki mat.
U Bah B. G. Lapang na Ri-Bhoi u la kyntu ïa ki paidbah ba ki dei ban ieng skhem ban ïada ïa ka lawei jong ki khun ki kti kiba dei ban ïoh ki kam ki jam bad kumjuh ruh ki surok kiba long u budlum jong ka roi ka par kaba ki MLA ki MDC ki dei ban wanrah ïa ka jingmyntoi jong u paidbah.

Leave A Reply

Your email address will not be published.