Shah pynsangeh ka Prokram ïakop rwai Khasi ha u Sordar

0

Shillong, Risaw 21: Shi sngi shuwa ba ka Seng Na Rynsan Ki Sur Tynrai Pynter Cultural, kan pynlong ïa ka jingïakop rwai Khasi ha ka Shnong Tngonphlang Madan Lyntad, Raid Shabong, u Sordar jong ka Raid Shabong, u Bah Biggestson Lyngdoh u la leit ban pynsangeh noh ïa kane ka jingthmu jong kane ka Kynhun Sur Tynrai kaba la buh ban pynlong ha ka 22 bad 23 tarik mynta u bnai.
Ïa kane la pyntip da u President jong kane ka Seng u Bah Nikelson Khongmawloh bad u Secretary u Bah Eliphiles Nongrum, kiba la kyrpad ruh ïa kito baroh kiba la ai kyrteng ban wan ïashim bynta sha kane ka jingïakop ban sangeh noh bad ban nym sngew eiei ïa kane ka jingpynpep ba kyrkieh.
Ka Seng Sur Tynrai ka la kynnoh ruh ba kane ka jingpynsangeh u Sordar Raid Shabong la don lang ki briew kiba la kam ïalade ba kidei ki dkhot ka KSU bad FKJGP Pynursla.
Haba ïakren bad u President, Bah Nikelson, u la ïathuh ba kane ka jingpynsangeh kyndir ka la ktah shibun ïa ka Seng, namar ba ladep pynkhreh lut nadong shadong bad la shna ruh ïa ki Dara bad Rynsan na ka bynta kane ka Prokram kaba thmu ban pynmih pisa na ka bynta ka jingtreikam jong ka Seng.
Haba pynshai khambha ïa kane, u Bah Nikelson, u la ïathuh ba ha ka jingshisha ïa ka jingbit ne ka permission ban pynlong ïa kane ka prokram la ïoh naduh kumba shi bnai mynshuwa na i SDO Civil Sub Division Pynursla. Nang la ïoh jingbit ruh na u Chairman jong ka Dorbar Saw Kur, namar kane ka jaka ka hap ha kita ki Saw Kur bad kiwei kiwei ki kam ruh la ju leh kumta ban pan jingbit na u Chairman ka Dordar Saw Kur kaba lon gtrai ïa kane ka jaka.
Shuh shuh u la ïathuh ba kane ka prokram ban pynlong ruh kadei ka jaka jong u President ka Seng, kaba la ai ïa u da ka Kur.

Leave A Reply

Your email address will not be published.