ïoh kurup drok ka DRI ba shongdor 15.54 klur na Mawryngkneng

Shillong, Risaw 21 : Ha ka jingbud dien jongka Directorate of Revenue Intelligence (DRI) ïa ki kynhun nongkhaïi drok kiba shyrkhei kiba pynïaid ïew ïa u drok ha kylleng ki jylla kane ka thaiñ, ha ka step phyrngap Sngi Palei ki la ïoh ban kurup haduh 2.21 kilo u drok na Mawryngkneng, East Khasi Hills uba shongdor 15.54 klur tyngka.
Une u drok u dei uba la khaïi na khappud Indo-Myanmar bad pynpoi sha Manipur bad na Manipur ka jingthmu ka long ban pynpoi ïa une u drok sha nongbah Shillong. Ki briew ka DRI ki la ïoh ban kem ïa arngut ki briew na ka kali ba la ïoh kurup ïa u drok bad pynngat ïa ki ha ka kyndon aiñ NDPS Act 1985.
Ki briew ka DRI Shillong ki la ïoh ban bat ïa kane ka kali katba ka dang ïaid lynti na Mawryngkneng ha ka por dang step jongka Sngi Palei. Haba la talasi ïa ka kli ki la lap haduh 150 tylli ki jingsob sabon ba khia baroh 2.22 kilo bad hapoh la thep da u powder rong blad. Haba la test da ki test kit ka NDPS la pynshisha ba une u dei u drok.
Ha ka jingtohkit ïa ki arnugt ki la phla ba la wan kit ïa une u drok na Manipur bad ka jingthmu ka long ban pynpoi sha ka kynhun nongkhaïi drok ba don hangne ha nongbah Shillong. Na ki dak ki shin kiba la lap hapoh ka kali ki DRI ki pynshisha ba kane ka kali ka dei kaba la ju myllien bha ban khaïi drok ha ki por kiba mynshwa ruh.Ka jingtohkit bniah bad ka jingbud dien ïaki nongkhaïi drok ha kane ka nongbah ka dang ïaid shakhmat.
Tang ha une u snem 2022 ka DRI ka la ïoh ban kurup haduh 21,000 kilo u drok na kane ka thaiñ, kine ki kynthup ïa u methampetamine, heroin, canabis bad ka dor ka long haduh 65 klur tyngka.