Shillong, Risaw 21: Hadien ba mih ka jingud jingnam na kiba bun ki nongshong shnong jong ka Mawprem bad Lumkshaid ïa ka jingkyrduh um kaba jur ha ka shnong u Myntri ka tnad PHE u Bah Renikton Lyngdoh Tongkhar ryngkat u Bah Paul Lyngdoh MDC bad ki nongïalam shnong kine ki shnong ha ka sngi Thohdieng ki la hiar ban leit jurip sha katei ka shnong ban sngewthuh da lade kaei ka daw ba pynlong ïa ka jingduna um sha kitei ki shnong.
Ha ka jinghiar jurip jong u kiba bun ki nongshong kiba ïa kynduh bad u ki la pynpaw ba kane ka jingkyrduh um ka dei dang ha kine ki khyndiat snem kiba la dep kata hadien ba u Bah Paul Lyngdoh u la shah rem noh ha ka ilekshon. Ki la ïathuh ruh ba kane ka jingkyrduh um ha ka shnong ka pynlong ïa ki ban hap shu thied um beit ha ka dor kaba 800 haduh 1000 shi kali.
“Ha ka por ba long MLA i Bah Paul lada don jingthudtka jingpynpoi um tang katto katne sngi eh ki shim por ban pynbha hynrei naduh ba i Bah Paul im long MLA shuh ka um ruh ka jah bad kam poi tista shuh” ong kawei ka longkmie.
Ha kane ka sngi na ka liang u Myntri u la leit ban jurip ïa baroh ki top pynlang um ban lap ïa ka daw jong ka jingkyrduh um ha kane ka shnong.
Haba kren sha ki lad pathai khubor U Bah Renikton u la ong ba ka jingwan jurip ka long ban lap la ka jingkyrduh um ka dei ba rit ka um ba poi sha ki thiar um ne ka daw ka jingthut ka jingsam um sha man ki thliew ïing.
“Ynda nga la hiar da lade nga sngewthuh ba ka don ka jingduna ha ka jingpynpoi um bad na ka liang jong nga ngan sa bthah ïa ka tnat PHE ba kan shim khia ïa kane bad ïa ka jingthut ha ka jingsam um kaba don hangne hangtai ruh ngan iakren bad ka municipal ba kan leh eiei namar kane ka buh jingeh ïa ki paidbah” u la ong.
Shuh shuh na ka liang u Bah Renikton u la ong ba na ka liang jong u un shim khia ba la kumno kumno shuwa ban kut une u snem ka jingkyrduh um ha Mawprem yn weng syndon.
Haba bynrap lang ïa kane u Bah Paul u la ong kane ka jingwan poi u Myntri ka dei hadien ba na ka laing jong u u kyrpad ïa u ba un wan jurip da la ki khmat ban lap ïa ka daw ba wanrah ïa ka jingkyrduh um.
“Ki paid nongshong shnong bapli ki ud ba da ki bun bun hajar tyngka ki hap pyllut na ka bai kamai barit ban ïoh thied um namar ka jingkyrduh um ka long kaba la palat liam ha ki katto katne ki kyntoit ka Mawprem” u la ong.
U la pynpaw ba da kane ka jingwan hiar u Myntri u kyrmen ba ka jingeh kaba ki paidbah ki ïa kynduh yn lah ban weng noh shen.
