Shillong, Risaw 21 : Ka Naitonal Peoples’ Party (NPP) kaba ïalam ïaka sorkar MDA ha kane ka jylla ka la pynkhreh ban pynïakhun da u nongkyntiew ïa ka kam jngohkai pyrthei bad u nongthoh khubor ba mynshwa u bah Alan West Kharkongor na ka Sohra Constituency ha kane ka Election MLA 2023. La sngewthuh ba ki nongïalam ka NPP ki la leit ban ïasyllok bad ïamir jingmut bad u bah Alan ruh hynrei na ka liang u bah Alan u ïeng ha ka nongrim ba dei ban shai shwa ha kaba ïadei bad ka jingdawa ban ïoh ïaka Sohra District bad kumjuh ruh halor ka Mawmluh Cherra Cement Limited (MCCL). U bah Alan u dei uwei na ki nongïalam jongka Sohra District Demand Forum kaba dei ka kynhun ba dawa ban kyntiew kyrdan noh ïa ka Sohra Civil Sub Division sha ka District.
Haba ïakren bad u nongthoh khubor u bah Alan u la ïathuh “ Ka long kaba shisha ba ki nongïalam ka NPP ki la ïakynduh ïa nga hynrei ngam pat shim ka rai ne aiktien haduh mynta bad ka jingïakren ruh ka dang ïaid shakhmat. Kumba phi tip kawei na ki mat ba kongsan kiba don hakhmat ka Sohra Constituency ki long ka Sohra District bad ka MCCL kaba dei ka pliang ja jong ki nong Sohra hi hynrei haduh mynta ka sorkar kam pat ai ka jubab kaba shai kdar halor kine ki mat”.
Haba la kylli hato ka por kam lyngkot eh ba sa tang san bnai la poi ka election u bah Alan u la ong “ Nga sngew thikna ba u kyrtong uba ïakhun ïa ka election halor ki mat kiba kongsan jong ka constituency ka por kam donkam. Namar ban ïa khun ïa ka election ka dei ban don da ki nongrim kumta u kwah ban ïoh jingpynshai shwa halor kitei ki mat ba la kdew haneng namar ma ngi ngi la long ki nongialam ha kaba ïadei bad ka jingdawa ban ïoh ïaka Sohra District kaba dei ka mat kaba kongsan tam”.
“ Shwa ba ngan shim ïa ka rai nga kwah ban ïoh shwa ki jingpynshai halor kine ki mat khamtam ha kaba ïadei bad ka Sohra District kaba dei ka kam kaba la sahteng la slem bad kaba ki paidbah ki la ïai ap khmih lynti la slem bah khamtam hadien ba la ïoh ka jingkular na ki nongïalam jongka sorkar ha ka por ba khlad u MLA jong Shella u (L) Dr Donkupar Roy.
U bah Kharkongor u la kren bynniaw ruh halor ka jingbym shim khia ban ïalam da u MLA na ka PDF u bah Gavin Mylliem bad u MDC na ka UDP u bah Titosstarwell Chyne uba dei ruh u CEM ha kajuh ka por. Ha ka por ba ka sorkar ka la rai ban ai district ïa ka Mairang bad pynduh ïaka Sohra kine ki arngut ki nongïalam ki shu sngap jar bad ki dei ban shim ka jingkitkhlieh halor ka jingduh District ruh. Nalorkata nalor ba kine baroh ar ki don ha kane ka sorkar MDA namar ka UDP bad PDF ruh ki ïatrei lang hynrei kim lah ban pynbor ïaka sorkar ban ai shwa ïaka Sohra hynrei ïoh pynban da ka Mairang kum kata ka District ba 12 jongka jylla ha u Naiwieng 2021.
U bah Alan u la ong ban da dei ba ki long ki nongïalam kiba shisha la dei ban ïoh ha kajuh ka por ïa ka Sohra bad Mairang District. Hynrei na ka liang u MLA ruh u shu ngap jar jar bad um shym la pynpaw ka jingpyrshah jur, katba ka Mairang ka ïoh namar ba u MLA jongka u bah Metbah Lyngdoh u ïalam na khmat ban dawa ïa ka Mairang District. U la pynpaw ka jingsngew diaw ba wat u CEM u la dei ban ïakren bad u bah Metbah ban shim khia lang na ka bynta ka Sohra kumba la dep kular da ki nongïalam ka sorkar.
Ha kaba ïadei bad ka MCCL u bah Alan u la ong, baroh ar ki nongïalam kim shym la shim khia ban bud dien na ka sorkar ban plie biang noh ïa kane ka kompani kaba dei ka pliang ja jong ki nong Sohra.
“ Kumta to ngin ïa ap kaei ka jubab ba ka sorkar kan ai lada ka shai bha halor ki ar tylli ki mat te nga kloi ban ïakhun ha kane ka kynti” ong u bah Alan.
U bah Alan kumba u long uwei na ki nongkyntiew ïa ka kam jngoh kai sha ki thaiñ nongkyndong u long ruh uwei uba shim khia ban kyntiew shuh shuh ïa ka kam jngohkai ha ka thaiñ Sohra.
