Dawa ka KSU ïa ka sorkar pdeng ban burom ïa ka IOA bad pyntreikam ïa ka Article 371

0

Shillong, Risaw, 21: Ka Khasi Students’ Union (KSU) ha ka sngi Thohdieng ka la dawa ïa ka Sorkar Pdeng ban burom ïa ka Instrument of Accession (IOA) ba la ïasoi bad ki 25 tylli ki Hima Khasi ha ka 17 tarik, Nailar, 1948 bad ban pyntreikam ïa ka Article 371 ha ka jylla Meghalaya.
“Ngin sa thoh sha ka Sorkar Pdeng ban pyntreikam ïa ka Standstill Agreement bad ïa ka Annexed Agreement – kiba long ki ar tylli ki soskular ba la sah pongding la palat 75 snem,” ong u nongïalam ka KSU u samla Lambokstar Marngar.
“Nalor ka Sixth Schedule, ka Sorkar Pdeng ka dei ban pynkup bor shuh shuh ïa ka jaidbynriew Hynñiewtrep da kaba pyntreikam ïa ka Article 371 (A) bad (G) kumba la leh ha ka jylla Nagaland bad Mizoram,” u la bynrap.
U Samla Marngar u la pule ruh ïa ki hynñiew tylli ki rai ba la shim hadien ka jingïathir nia halor ka Standstill Agreement, ka Instrument of Accession, ka Annexed Agreement bad ka Sixth Schedule bad kumno ban ïada ïa ka lariti bad ka tynrai na ka jingshah iuhroit ha ki aiñ bad ki polisi ka Sorkar Pdeng, kaba long shi bynta na ka jingrakhe ïa ka lyngkhuh sngi ïap kaba 34 snem jong u Pa’iem Wickliffe Syiem uba long u Syiem Khynnah jong ka Hima Nongstoiñ.
Une u heh nongïalam ka KSU u la ong, ba ka Sorkar Pdeng ka dei ban pynrung noh mardor ïa ka ktien Khasi ha ka Khyrnit Baphra jong ka Riti Synshar ka Ri India kum ka jingsdang ban burom ïa ka IOA ba la ïasoi bad ki 25 tylli ki Hima Khasi.
“Ka Sorkar Pdeng ka dei ban pyntreikam ruh mardor ïa ka Inner Line Permit (ILP) jong ka Bengal Eastern Frontier Regulation 1873 kumba la pyntreikam ha ka jylla Manipur naduh ar snem mynshwa. Ngi la dawa ïa ka ILP mynta la palat 35 snem,” u la ong.
U la ong ba ka Federation of Khasi States kan sa wad ïa ki lad ki lynti ban pynrung ïa ki khlieh nongsynshar ba kynthup ïa ki Daloi bad ki Waheh Chnong jong ki Elaka ka rilum Jaiñtia.
Kane ka jingïathir nia ka la pynmih ruh ïa ka rai ban pyntreikam noh ïa ka jingrwai ieid ri jong ki paid u Hynñiewtrep.
“Ngin sa pynsngew sha ka Sorkar Pdeng halor ki jingdonkam jong ngi ban don la ka jong ka jingrwai ieid ri namarba ngim sngewthuh wat tang shi kyntien ruh ïa ka jingrwai ieid ri jong ka ri India bad ha kajuh ka por kane ka jingrwai ba la thoh da u Rabindranath Tagore kam shym la kynthup lang ïa ngi. Namarkata, ngi sngewthuh ba ngim dei ki nongshong shnong ka ri Indai mynba ki la shna ïa ka jingrwai la ka ri ha u snem 1911,” la ong u President ka KSU.
Ki nongïashim bynta ha ka jingïathir nia ki kynthup ïa u Bah Spiton Kharakor, ki MDC ba kynthup ïa u Bah PN Syiem bad u Bah Paul Lyngdoh, u Nongaitkien ka FKS u Bah John F. Kharshiing bad u President ka HNYF u Bah Sadon Blah.
U Khun jong u Pa’iem Wickliffe Syiem u Bah Andrew Shalomar bad u para jong u ki la ïashim bynta lang ha kane ka jingïalang bad kren ruh ba kumno ki Khasi ha ka ri Bangladesh ki im jynjar ha ka shong ka sah.
“Lada ngi klet noh ïa la ka thymmei kum ka jinglong Khasi bad ban im ïa ka jingim Muslim ngi lah ban im ha Bangladesh ha ki 50 snem ki ban sa wan hynrei lada ngim lah ban leh kumta, kan eh bha bha ban im. Namarkata, nga kyntu ïa ki paidbah ha kane ka ri Khasi ba kin pyrkhat lem na ka bynta jong ngi lada ngi ïoh jaka shuh ban shong ban sah ha ka ri Bangladesh,” la ong u Bah Shalomar.

Leave A Reply

Your email address will not be published.