Kynnoh ba bom ki pulit Umkiang ïa u bah Joslymon haduh ban da jngem

Khliehriat jymmang 29: Ka kmie jong u bah Joslymon Lyngdoh, ka kong Klis Lyngdoh bad u kpa u bah Dominic Myrchiang, kiba na shnong Umkiang East Jaiñtia Hills District, ki la kynnoh ba u khun jong ki u bah Joslymon Lyngdoh u la shah shoh ha ki pulit jong ka Umkiang Patrolling Post myn ha ka 21 tarik mynta u bnai bad katkum ba paw ha ki dur ba la ioh pdiang utei u ba shah shoh u la jngem snam lut na ki bynta ka lbong bad ki kjat, ki la kynnoh ruh ba na ka daw ka jjing shah bom shah tied u khun jong ki u la shitom jur bad ktah ruh ïa ka bor pyrkhat jong u bad mynta u don hapdeng ka jingshah sumar ha Woodland Hospital Jowai.
La ong ruh ba ki Pulit Umkiang ki la wan kem ïa u Joslymon Lyngdoh halor ka ejahar ba u la shah pharep donkti ha ka kam tuh motor bike na ka thaiñ Assam ha kaba la buh ejahar pyrshah ïa u ha Rongpur Police Out Post, Silchar Assam bad halor kane ka jingshah pharep ki kmie ki kpa ki la pynpaw ba kim tip ei ei bad ki shaniah ha ka bor jong ka aiñ ban leh ia kaba donkam, na ka liang u kpa u la pynpaw shuh da kaba ong ba ha ka jingshisha ki Pulit Umkiang ki dei tang ban kem ïa u bad aiti noh sha ki Pulit Assam namar ba kaba dei ka ejahar kaba na Assam hynrei phewse ki la kem bad bom bad shoh pynban ïa u bad ki la leit ban aiti sha ki pulit Assam haduh ka por kumba 11 baje myntiet.
“Hadien ba la shimti ki Pulit Assam, ngi la ialeh ban pyllait jamin lyngba ki muktiar bad myn ha ka 26 tarik u la ioh jamin, ngi la rai ban leit buh jingujor sha u Superintendent of Police, East Jaiñtia Hill District bad kumjuh sha ka Meghalaya Human Right Commission, Shillong, khnang ba kin ioh ïa la ka hok.
Halor kane kaba la jia ïa u bah Joslymon Lyngdoh na ka liang ka Khasi Students Union Narpuh Circle ruh ka la pynrem jur ïa ka jingleh ki pulit Umkiang bad ka seng lyngba u President KSU Narpuh Circle, u bah Phanuel Tongper, ka seng ka pynpaw ka jingsngew khia halor kane kabba la jia ha Umkiang.
Katkum u kyrwoh ba la phah da u Dominic Myrchiang, u ba dei u kpa jong u bah Joslymon Lyngdoh, la ong shuh shuh ba u pulit na Umkiang u la pyndonkam beaiñ ïa ka bor da kaba u la om la tied haduh ban da mynsaw jur bad haduh ban da ktah ïa ka bor jingmut, jingpyrkhat bad na ka liang u kpa u kyntu ia ki bor ka aiñ ba kin shimkhia ïa kane ka kam pyrshah ïa ki pulit ba donkti ban leh katkum ka aiñ bad ruh ban leh kham kloi ïa ka jingtohkit.