Ka jingbym biang ka pule puthi ka daw ka jinghiar ka PGI bad ka jingpynkylla ka sorkar kan shimpor ban ïohi ïa u soh

Shillong, Jymmang 29 : U Myntri Sorkar bad President ka UDP Bah Metbah Lyngdoh ha ka sngi Thohdieng ula ong ba ka jingïoh kyrdan ba sha trai ka Meghalaya ha ka Performance Grading Index (PGI) ka dei namar ka jingbym biang ka rukom pynïaid ïa ka pule puthi na ki skul naduh ki por ba mynshwa bad kaba la hiar pateng haduh mynta.
Hynrei ula ong ba ki jingpynbeit bad jingpynkylla jong ka Sorkar ki la sdang ban pyni ïa u soh. “Ka PGI ka wanrah ïa ka jingsngewkhia kaba jur bad kane ka la ïaid mynta la bun snem” ong u Bah Metbah haba jubab ïa ka jingkylli halor ka jingïoh kyrdan PGI ka Jylla.
“Hynrei ki don bun ki sienjam ba la shim da ka Sorkar, bad ngi la sdang ban ïohi ïa u soh ka jingtrei kam” ula ong haba bynrap ba kane ka jingeh ka Jylla ka dei kaba la hiar pateng khamtam ka jingbun jait ki rukom pynïaid ïa ki skul.
“Kane ka dei ka jingeh kaba ngi la ïoh pateng la bun bun snem mynta” ula ong. “Ki don bun jait ki 10-15-20 jait ki skul ha ka Jylla. Balei kumta? Namar shibun kiei kiei kiba la klet ha ka por ba ki Sorkar ki shim ïa ka sienjam ban seng ïa ki skul thymmai hapoh ka Jylla”.
U Bah Metbah ula pynpaw ba ka jingrit ka tulop ki nonghikai kum ka jingeh ban ai ïa ka jinghikai kaba bha. “Wat haduh u bnai ba la lah, phi lah ïohi katto katne ki nonghikai kiba ïoh ia ka tulop ba T.10,000, T.20,000, T.30,000 bad T.40,000” ula ong.
Ula kubur ba ki jingpynkylla kin ym wanrah ïa u soh ka jingkylla ha ka shimiet. “Ka Sorkar kala shim ïa bun ki sienjam haba ïadei bad kane ka jingeh hynrei kan dang shim por ban ïohi ïa u soh” ong u bah Metbah.