Ka Meghalaya kan jied ïa u MP ka Rajya Sabha ha ka 18 tarik Jylliew, ha kajuh ka sngi yn niew vote: Dr Tiwari

Shillong, Jymmang 29: U Chief Electoral Office (CEO) u Dr BDR Tiwari ha ka sngi Thohdieng u la pynbna ba ka Meghalaya kan jied ïa u MP ka Rajya Sabha ha ka 18 tarik Jylliew bad ka jingniew vote kan long hi ha kane ka juh ka janmiet.
Kane ka elekshon ka dei kaba la pynlong ban pyndap ïa ki shuki kiban lait thylli ha ka 21 tarik Jylliew.
U Dr.Tiwari haba ïakren bad ki nongthoh khubor u la ong, “Ngi la ïashong jingialang bad ki seng sain pyrthei haba ïadei bad ka jingpynlong ïa ka elekshon Rajya Sabha ba shisien ha ka arsnem hapoh ka Jylla Meghalaya, namar ka samoi treikam u MP Rajya Sabha kala dei ban kut noh hapoh ka 21 tarik Jylliew.Kumta, donkam ban pynlong ïa ka elekshon la kumno kumno ruh hapoh ka 20 tarik Jylliew”.
Haba pyntip ïa ka por bala buh da ka Election Commission of India, ula ong ba ïa ka jingpynbna yn sa pynmih ha ka 1 tarik Jylliew.
“Ka sngi ba khatduh ban thep kyrteng ka dei 8 tarik Jylliew, ka jingbishar kyrteng kan long ha ka 9 tarik Jylliew bad ka sngi ba khatduh ban weng ïa ka jinglong kyrtong ka dei 11 tarik Jylliew, 2026” ula ong.
Shuh shuh u Dr Tiwari u la ong, “Ka sngi ban thep vote kan long ha ka 18 tarik Jylliew naduh ka por 9 baje mynstep haduh 4 baje janmiet.Ka jingniew ïa ki vote kan long ha kajuh ka sngi ha ka por 5baje janmiet bad ïa kine ki kam dei ban pyndep hapoh ka 20 tarik Jylliew, 2026”.
Ki bor pyniaid Eleskhon kila leit ban khmih bniah ïa ka jaka pynlong ïa ka elekshon hapoh ka Iingdorbar Thaw Ain ka Jylla ha ka step sngi Nyngkong.
“Ngi la leit jurip ïa ka jaka ha ryngkat ki Ophisar na ka Meghalaya Legislative Assembly bad ngi la shem ba baroh ki long kiba ihun kat kum ki kyndon, ka por bad ki jingpynbiang ïa ki jingdonkam kumba la bthah da ka ECI” ula ong.
U CEO ula batai bniah ïa ki kot ki sla ba hap pynbiang da ki kyrtong. “Ngi la batai ïa baroh kiei kiei sha ki seng sain pyrthei haba ïadei bad ka jingthep kyrteng kynthup ka jingaiti ïa ka Form 2C, affidavit ha ka Form 26, Security Deposit, Form A bad Form B lada dei u kyrtong ka seng sain pyrthei kynthup ka kyndon ba ïadei bad ka Form C1 haduh C 8” ula ong.
Ula batai ia ka jingdonkam ba ki kyrtong bad seng sain pyrthei ki hap ai beit ïa ki jingtip lada don ki kam bymman ba kila shah pynngat teng kat kum ka jingbthah ka ïingkashari Supreme Court bad jingthah bala pynmih da ka ECI.
Shuh shuh u Dr Tiwari ula ong “Ka rukom pyniaid ïa ka elekshon kan long da ka open ballot hapoh ka Representation of People Act 1951 ïa kaba la dep ruh ban batai sha ki seng sain pyrthei”.
Ula pyntip ba ïa ki notice jong ka jingialang la dep ban phah lut sha baroh ki seng sain pyrthei hynrei ki don katto katne ki bym shim la wan ïa shim bynta.”Ngi la pyrshang ban ïakren bad ki lyngba ka phone hynrei namar ba ki don ki kam sha wei, kim shym la lah ban wan ïa shim bynta” ula ong.
Halor ka elekshon Lok Sabha, u CEO ula ong “Ka elekshon kan sa long hadien ba ka ECI kala pynbna ia ka tarik.
Ula pynthikna ruh ia ka jinglong bala khreh ban leh ïa ka Special Intensive Revisson jong ka electoral roll.
“Ki nongtrei ka tnad elekshon ki la long kiba la khreh.Namar la dep pynbna ïa ka tarik jong ka SIR na ka bynta ka Jylla Meghalaya, ngi la long kiba la pynkhreh ban leh ïa ka SIR hapoh ka Jylla” ong u Dr Tiwari.