Hap pynrieh ka Hima Nonglang ïa ki 25 ngut ki samla ka shnong Malchapara ba shah thwet ha ki Pulit Assam

Kumba 35 ïing na ki 108 ïing kiba kwah ban leit sha Assam

0

Nongstoiñ, Lber 28: Ka office jong ka Hima Nonglang Sirdarship ka la hap ban pynbuhrieh bad sumar sukher ïa ki 25 ngut ki nong Malchapara kiba shah pyndik bad shah thwet ha ki pulit Assam naduh kine ki khyndiat sngi ba la dep.
U Bah Vinat Sangma uwei na ki riew rangbah ka shnong Malchapara, ka shnong kaba dang hap hapoh ka Hima Nonglang, u la ïathuh ba ka jingmih ka jingïakajia ha kine ki khyndiat taiew ha katei ka jaka, ka long namar ka la don ka kynhun jong ki 35 Ïing kiba don ha katei ka shnong, kiba khang pyrshah ïa kitei ki samla 25 ngut ban leit ïalehkai kriket ha ka madan shnong.
La ong ba kitei ki 35 ïing ki ong ba ïa katei ka madan la aiti ha ka Assam hadien pynbeit pud sam lyngba ka MOU ha u snem ba la dep. Kumta ym shah shuh ïa kito kiba dang kwah ban hap ha Meghalaya ban dang rung ne ïalehkai ha jaka jong ka Assam.
Kumta naduh katei ka sngi ba shah khang ïalehkai kriket, ki pulit Assam ruh mar mar lyngba ka jingkyrshan jong kitei ki 35 ïing ban leit noh sha Assam, ki la wan thwet ïa kitei ki 25 ngut ki samla, da ka jingthmu ban kem bad pynngat ïa ki ha ki kyndon aiñ.
Na ka liang u Secretary ka Hima Nonglang u Bah Birbor Riangtem, u la ong ka Hima ban lait kumba long ka jingjia ha Mukroh, ka Hima ka hap wanrah noh ha Office ka Hima ha Langdongdai ïa kitei ki 25 ngut kiba shah thwet ha ki Pulit Assam.
U la ong ruh ba ka Hima ka hap ban ri ban sumar ïa ki hapoh ophis jong ka Hima tad haduh ba ka sorkar Jylla hi kan tuklar halor kane ka jingjia kaba la jia mynta ha katei ka thaiñ. U la kyrpad ruh ïa ka Sorkar ban ïarap lem ïa ka Hima, namar ki paidbah bad ka Hima hi ki la lynga bad mad jingeh tang hadien ka MOU ba la ïa soi ka MDA ha u snem ba la dep.

Leave A Reply

Your email address will not be published.