Hap ban pynlip bording ki ïing ha ka miet sngi thohdieng, kyntu ka DCD&HG ïa ki paidbah

Shillong, Ïaïong 23: Ka Directorate of Civil Defence and Home Guard (DCD&HG) jong ka Jylla Meghalaya ka la pynkhreh lypa na ka jinglah ban shah thombor bad ban shah hiar thma jong ka ri India ha kiwei pat ki nongshun kiba wan na kiwei ki ri lyngba na suiñ bad da kiwei pat ki bynta.
Haba kren sha ki lad pathai khubor u Bah B Mukhim Joint Director Civil defence bad DIG ka SDRF bad u Bah P H Shylla senior staff officer Directorate Civil defence bad Public Relations Officer (PRO) ki la ong ba ki paidbah kidei ban long kiba husiar na ka jinglah ban shah thombor ka India ha ki nongshun jong kiwei pat ki ri ka pyrthei bad kyrpad ruh ïa ki nongshong shnong ban ïatreilang ha kane ka jingpynkhreh na ka bynta kane ka kam kaba kongsan.
Ki la ïathuh ruh ba ka Mock Exercise on Air Raid bad ka Black Out kaba la ai kyrteng da ka ARMEX-1 2026 kan long ha ka Sngi Thohdieng ha ka por 3 baje janmiet kaba dei ka bynta kaba nyngkong bad kumjuh ruh ka bynta kaba 2 kan long ha ka por 7 baje mynmiet kaba dei ka Black Out haba baroh ki nongshong shnong kin hap pynlip baroh ki light kynthup ruh ïa ki jaka ba don ki Futsal.
Ki pyntip ruh ba ka jingpynlong ïa kane ka jingkilan lypa kadei ruh ka jingbhah jong ka Sorkar India ban long ba la khreh na ka bynta ki Tnat Ïada ri ne ïada paidbah ba kin pynkhreh bad da kaba pynlong ki jingkilan met ban ïada ïa ki nongshong shnong haba wan kum kine ki jingjia shah hiar thma ha ki nongshun.
Ha kane ka Mock Exercise on Air Raid bad ka Black Out kin don bun ki tnat ban ïashimbynta ha baroh ki district jong ka jylla bad kan don ruh ka jingpynpah ïa ki Siren ha baroh ki artylli ki bynta jong ka Mock Exercise kiba don la ki jong ki jingmut.
Haba ong ba kane ka Mock Exercise ka dang dei ha ka sien kaba ar ha ka jylla, na ka liang u PRO u la ong ba kane ka long ban hikai ïa ki paidbah kumno ban leh lada ka don ka jingshah hiar thma na suiñ ha ki nongshun.
U la ong ha ki por kiba mynshwa kum kane jingai jinghikai la juh leh lada don ka jingkhih jumai, hynrei ha kane kynti kaba mynta ka long lada don ka jingshah thombor ka Ri India ha ki ri kiba na shabar, lah ban long da ki liengsuiñ, ki missile bad kumba la shem ha kine ki thma kiba dang jia la shem ba la pyndonkam ruh ïa ki drone.
Na ka liang u Bah Shylla u la ïaiban biang ba kaba kongsan kaba donkam eh ha kane ka por kadei ka jingïasnohkti lang jong ki paidbah ka dei na ka bynta kaba ar ka long ban pynlip ïa ki light baroh ha ki bynta jong ka jylla, kane ka long ban pynpulom noh ïa ka jingthmu jong ki nongshun haba ki mut ban wan hiar thma ban pynhab bom ban pynjulor ïa ki jaka hapoh ka ri.