Ha ki 5 snem yn lah pynduh jait ïa u drok ha Meghalaya lada ïatreilang ki paidbah: Director DREAM

Shillong, Ïaiong 23 : U Director jong ka Drug Reduction, Elimination & Action Mission (DREAM), Bah Francis Kharshiing u la ong ba ïa u drok ha Meghalaya lah ban pynduna bad ruh wat ban pynduh jait ha ki san snem lada baroh baroh ki ai ka jingïatrei lang kynthup naduh ki paidbah haduh ki tnad sorkar ha kane ka mission.
“Ïa ka jingpyndonkam drok ha ka jylla lah ban pynduna bad wat ban pynduhjait hapoh ki san snem tang lada baroh ki snohkti lang ha kane ka mission naduh ki paidbah haduh ki tnad sorkar,” ong u Bah Francis ha ka conference ba shisngi halor u drok kaba long ha West Garo Hills District ha kane ka sngi Palei.
Shuh shuh u la ïai ban ba dei tang da ka mynsiem ka jingkitkhlieh bad ka jingïatrei lang da baroh kaba lah ban ïakhun pyrshah ïa katei ka jingeh.
U Bah Francis u la ong ruh ba ka mission ka donkam ïa ka jingtreilang kaba skhem ha ki tnad sorkar bad khamtam eh ha ki shnong ki thaw ban pynkhlain ïa ka jingïakhun ïa u drok ha Meghalaya.
Na ka liang ka Chairperson jong ka Meghalaya State Commission for Protection of Child Rights, ka Agatha K Sangma ka la pynpaw ïa ka jingsngewkhia halor ka jingïoh suk ïa kine ki jingdih ba sniew kynthup ïa u drok, duma hapdeng ki khynnah.
Da kaba buh hakhmat ïa ka jingdonkam ban ïada ïa ki khynnah ka la banjur ïa ka jingdonkam kyrkieh ban ai jinghikai bad jingpynshai ha ki jaka pule ban ïada ïa ki khynnah rit ba kin ngop ha kum kine ki jingsniew.
Ïa kane ka conference la pynlong da ka Meghalaya State Commission for Protection of Child Rights ha ryngkat ka jingïatrei lang bad ka District Social Welfare Office bad ka ophis jong ka District Child Protection Unit. Ka thong jong kane k along ban wanrah ïa ka jingïatrei lang kaba jan hapdeng ki tnad sorkar ha ka jingïakhun pyrshah ïa u drok bad ki jingmlien ba sniew ha ka distrik.