Halor ki nongrim, dawa ka KSU-NC na u Doloi Narpuh ban sangeh ban ai syrnot NOC ïa ka karkhana dewbilat

Khliehriat, Jymmang 30 : Sa kawei pat ka karkhana dewbilat, ka Meghabond Cement Ltd, mynta kala don ka jingthmu ban sdang ïa ka karkhana ha shnong Wahiajer, East Jaiñtia Hills District, kumta na ka liang ka Khasi Students Union Narpuh Circle, ka la mih shakhmat bad buh ka jingkyntu bad ruh ka dawa na u Doloi jong ka Elaka Narpuh ba u dei ban sangeh ban ai syrnot (No Objection Certificate) ïa kane ka karkhana, namar ïoh lehse, haleh u Doloi u don jingmut ban ai syrnot ïa katei ka karkhana.
Ha ka shithi ba la phah da ka KSU Narpuh Circle ba la soi kyrteng da u President, u bah K.S.Suchiang bad u General Secretary, u samla S.Bamon, ka seng ka la kyntu jur ïa u Doloi ka elaka Narpuh, u Doloi Manbha Kyndoh ba u dei ban sangeh ïa ka jingai syrnot ïa ka Meghabond Cement Ltd ha kaba la pynpaw bad ong ba “La katno tylli ki karkhada dewbilat kiba la don haka thaiñ jong ngi kim shym la bud ryntih ïa ki kyndon ïada mariang ne ïa kata ka Environment Protection Act, wat tang kawei na ki karkhana kiba la don ruh kim don satia ïa ka ETP bad ka STP ki karkhana ki la shu leh tohmet bad pynjot thiaw ïaka mariang sawdong bad na ka daw ka jingioh leh mom ba kin sa shlur ban wan seng kam, namar ym don jingpynshitom ei ei ïa ki”
Ha kaba ïadei bad ka jingjot ka mariang, ka seng ka la ong ba lada ailad shuh shuh ban wan ki karkhana ha ka thaiñ ka ap jingma ïaka mariang, kan wanrah shuh shuh ïa ka jingjulor ki um, ki wah, ki tyllong um kin sa kylla bih kumba jia ia ka wah Lunar bad ka wah Lukha, ki khlaw kin sa nang syllen, ki paidbah khamtam ki khyllung, ki tymmen kin sa shu ring mynsiem da ka lyer pum pum, kane kan sa buh jingma ïa ka koit ka khiah jong ki paidbah nongshong shnong ha ka thaiñ.
Shuh shuh ka seng ka la pynpaw ka jingsngew khia da kaba ong ba kumno ki briew kin im ryngkat bad kine ki karkhana, haba tang hapoh 5 kilo mitar ki la don haduh 5-6 tylli ki karkhana (cement plant), kumno ka koit ka khiah jong ki nongshongshnong bad kaei ka ban jia khamtam ïa ki khyllung, hakajuh ka por la ong ba ha kaba ïadei bad ka jingiohkam, iohjam ruh, ka seng ka la dep sakhi ba ki trai ri trai muluk ki ïoh kam tang 25 percent katba 75 percent pat la kurup da u mynder, u bar jylla, la bynrap ruh ba kane ka jingwan ki briew kiba na bar jylla, ka plie lad ïa ka jingwan rung kyrthep ki mynder ka bym ithuh ithaw shuh bad kane ka wanrah ïa ka shongsyier bad buh jingma ïa ka dong ka thaiñ baroh kawei , ha kajuh ka por kane ka wanrah ruh ïaka shongkha khleh,
La ong ba kine ki long ki mat kiba tang khyndiat eh ki jingeh kiba ka seng ka la kdew bad pynpaw ha u Doloi.
“Te ma Doloi, phi kum u khlieh jong ka elaka uba ïohi jngai, uba don ka jingkitkhlieh ïaka pateng ban wan ngi kyntu ïa phi ban pynsangeh shwa ban ai syrnot (NOC) ïa ka Meghabond Cement Ltd, kata, lada phi don jingmut ban ai, hooid phim lah ban shim rai marwei ïa kane, phi hap ban khot ïaka dorbar elaka ban ïa ai jingmut lang da u paidbah ban sngap ruh ïa ka sur jong u paidbah la u kyrshan ne pyrshah, ngim dei kita ki nongpyrshah ïaka roi ka par, ngi tip ba haba wan ki company ngi ioh ka roi ka par (development) hynrei ha kajuh ka por, ka jingjot kaba shyrkhei ruh ka wan ryngkat bad ka jingtim” pynkut ki nongïalam jong ka Khasi Students Union Narpuh Circle.