Jowai, Jymmang 30: Ha ka jingrakhe ïa ka World No Tobacco Day (WNTD) na ka liang ka tnat NTCP Meghalaya bad ka Education Department ha ka jingïatreilang bad ka Sambandh Health Foundation kila lah ban pynlong ïa kane ka campaign kaba jop da ka jingïashim bynta jong ki khynnah skul ha ki ar tylli ki kam (activities) kita ki long ‘Jingïaid Rally pyrshah duma’ bad ka ‘Signature Campaign’.
Ki skul kiba la jop ha kane ka prokram na West Jaiñtia ki kynthup ïa ka Kharkhana Govt. LP School, Kharkhana na ka liang ki LP Skul, ka Madankhliehriat Presbyterian UP School, Mowkaiaw na ki Upper Primary Skul, ka Tome Memorial Secondary School, Jowai na ki Secondary Skul bad ka Laishnong HSS na ki Higher Secondary.
Tang ha West Jaiñtia Hills District ki don 794 tylli ki skul kiba la ïashim bynta ha kine ki ar tylli ki prokram. Kila don haduh 40,422 ngut ki khynnah skul kila lah ban pynlong ïa ka jingsoi kyrteng (Signature Campaign) bad kila ïoh haduh 8,21,447 tylli ki jingsoi.
Na ka liang jong ki bor pynïaid kila ai khublei ïa ka tnad DSEO, DMC, SDSEO, ïa u Deputy Commissioner ka West Jaiñtia Hills District u bah Batlang Samuel Sohliya, IAS. Kila ïaroh ruh ïa ki Nodal Officer, ki BMCs BRPs, CRCs, ki Principal bad ki Nonghikai baroh kiba la shimkhia ban pynlong ïa kane ka prokram kaba jop. Kane ka jingshim khia jong ki skul bapher bapher hapoh ka jylla Meghalaya lyngba ki Block bad ki District kala pynlong ïa ka jylla ban jop ïa ka khusnam na ka World Health Organization Award 2023 hapoh Southeast Asia Region.
