Ka jingsnoh kti lang ki paidbah kan pynkhlaiñ ïaka jingai snam ban pynim ïa ki briew

0

Nongpoh, Jymmang 30: Ban nang pynkhlaiñ ïaka jingpyndap ïaka snam haki Blood Center bad ban wan rah ruh ïaka jingïatreilang bad ki paidbah ban ai sngewbha ïaka snam, ban pynim ïa kiba bun ki mynsiem briew haka por ba donkam kyrkieh ka tnad jong ka Directorate of Health Service, Ka Meghalaya Aids Control Society, ka Meghalaya State Blood Transfusion Council ka National Health Mission haka jingïatrei ryngkat bad ka Terumo blood and cell technologies mynta ka sngi kala pynlong da ka prokram ba kyrpang bad kumjuh ruh ka Blood Donation Camp ban pynsngewthuh sha ki paidbah bad pynkhlaiñ halor ka jingdonkam ban ai snam, bala tip kum ka Strengthening of Blood Ecosystem.
Ha katei ka sngi la wan ruh ban shim bynta da ka kong Ampareen Lyngdoh Myntri ka tnad ka koit ka khiah kum ka kongsan, u Bah Mayral Born Syiem Chairman ka Meghalaya Health Advisory Board ba dei ruh u MLA ka Nongpoh kum u symbud kongsan, u Sampath Kumar IAS, Principal Secretary Health & Family Welfare Department, U Arpit Upadhyaya Deputy Commissioner ka Ri-Bhoi, bad kiwei kiwei ki heh ophisar naka tnad ka koit ka khiah.
Haba kren ha katei ka sngi kum ka kongsan ka kong Ampareen Lyngdoh kala ong baka jingai snam ka long kaba bha, bad kam don jingktah hynrei ka pynim pat ïa kiba bun ki mynsiem briew, da kaba khot bad wer ruh ïaki samla ba kin mih shakhmat ban ai sngewbha ïala ka jong ka snam khlem jingtieng, namar ka jingai snam ka dei ba ka pynim tang ïa u nongpang hynrei ka pynbha ruh ïaki nongai snam ban pyndap biang da ka snam kaba khuid haka met jong ki ba kum ki paidbah ki dei ban long kylluid mynsiem ban mih shakhmat ban ai snam.
“Ka jingjynjar ban pyndap ïaka snam haki jaka sumar bapher bapher hapoh ka jylla ka la wan rah ïaka jingeh kaba khraw naka bynta ki nongtrei jong ki tnad ka koit ka khiah ban sumar ïaki nongpang kiba donkam ïaka snam bad la don ruh ka jingduh noh ïaki mynsiem briew kiba bun ha kaba ym lah ban ai snam ha kapor kaba biang haba ki poi sha kajaka sumar, ïa kine ki jingeh la ju shem haki por jingjia aksident, hakaba u u nongmynsaw u donkam kyrkieh ïaka snam bad ruh ka jylla ka la mat ruh ïaka jingeh ban pyndap ïaka snam haki por ba wan lynshop ka khlam Covid 19 ha ka jylla” la ong ka Kong Ampareen da kaba bynrap ruh ba naka liang ka sorkar kan sa ïatreilang ruh bad kiba lah ban kyntiew ïaka jingai snam bad ruh ban ïakhun ïaka jingkyrduh snam haka jylla.
Ha katei ka sngi la thang ruh ïaka sharak kum ka dak ka jingplie paidbah ïa katei ka prokram ban pynshlur sha ki paidbah ba kim dei ban ai snam tang ïa kiba ieid ba thoiñ, ne ki bahaiing ha sme hynrei naka bynta jong baroh lang ban pynim ïaki mynsiem briew.

Leave A Reply

Your email address will not be published.