Haduh 99.62 % ïoh ka jylla Meghalaya ha ka jingpynkylla ïa ka thup nongthep vote

Shillong, Naitung 28: Ka Jylla Meghalaya ka la ioh pdiang 99.62 percent ha kane ka Special Intensive Revision (SIR) kaba dang ïaid shakhmat ïa ka thup kyrteng ki nongthep vote na ka bynta u snem 2026, ha kaba ka jingkhein ïa ki briew na kawei ka ïing sha kawei pat ka la rung sha ka sngi kaba khatduh, ong u Chief Electoral Officer (CEO) u Dr. B.D.R. Tiwari ha ka sngi Ba-ar.
Haba kren ha ka jingialang bad ki nongthoh khubor ha Shillong, u Dr. Tiwari u la ong ba la sam ïa ki phorm khein briew sha ki 2,340,764 ngut ki nongthep vote na ka jingdon jong ki nongthep vote baroh jong ka jylla kiba don 2,349,645 ngut.Ia ki nongjied kiba dang sah ym shym la lah ban lap ha ka por ba pynlong ïa ka jingsam phorm.
U la pyntip ba ki 2,278,071 tylli ki enumeration form, kiba kot sha ka 96.95 percent na baroh ki nongthep vote, la dep ban pyndonkam da ka digital.Ia ki phom kiba dang sah yn sa pynkylla digital hapoh ka por ba la buh shwa ban pynmih ïa ka draft electoral roll ha ka 5 tarik u Nailur.
Ka jingkhein briew na kawei ka iing sha kawei pat la buh ban pynkut ha ka 29 tarik u Naitung.
Shwa kane ka sngi, ka ophis jong u Chief Electoral Officer ka la pynlong ïa ka jingïalang bishar bniah bad ki nongmihkhmat jong ki seng saiñ pyrthei ba la ithuh ha ka ri bad ka jylla ban pyntip lyngkot ïa ki halor ka jingïaid shaphrang jong ka jingpynkylla bad ka lynti kaba ïalam sha ka jingpynmih ïa ka draft roll.
U Dr. Tiwari u la ïathuh ba ki seng saiñ pyrthei ki la ai ïa ka jingïatreilang kaba pura ha baroh kawei ka jingïaid lynti, ha kaba palat 1,600 ngut ki Booth Level Agent (BLA) la pyntreikam ha kylleng ka jylla ban ïarap ïa ki ophisar ka tnad elekshon.
“Ngi sngewnguh shibun eh ïa ka jingïashim bynta bad ki jingai jingmut kiba tei jong ki ha baroh kawei ka jingtreikam jong ka SIR,” u la ong bad bynrap ba ym shym la ïoh kano kano ka jingujor na kano kano ka seng saiñ pyrthei ha kaba ïadei bad ka jingpynkylla.
Katba ka jingpynshisha ha madan ïa ki jingthoh jong ki Absentee, Shifted, Dead and Duplicate (ASDD) ka dang ïaid shakhmat ha baroh ki district.La ithuh haduh 224,435 ngut ki nongjied hapoh ka kyrdan ASDD ban pynshisha.
U CEO u la ong ba ki jingialang bishar bniah man ka taiew bad ki video conference man ka taiew la pynlong bad ki Ophisar jong ka District Election Officers (DEOs), ki Electoral Registration Officers (EROs) bad ki Assistant Electoral Registration Officers (AEROs) ban pynthikna ba ïa ka jingtreikam la pyndep katkum ki jingbthah jong ka Election Commission of India (ECI).
Hadien ba la pynmih ïa ka draft electoral roll ha ka 5 tarik u Nailur, yn ailad ïa ki nongjied bad ki seng sain pyrthei ban ujor ïa ki jingdawa bad ki jingpyrshah shwa ban pynmih ïa ka thup nongthep vote kaba khatduh.