2166 ngut ki nongthep vote ki kyntait ïa ka EF ha Meghalaya, maham u CEO ban shah kyntait

Shillong, Naitung 28: Ki nongthep vote ha Meghalaya ki la don haduh 2,166 ngut kiba la kyntait ban aiti ïa ki Enumeration Form jong ki katkum ka Special Intensive Revision (SIR), 2026, ong u Chief Electoral Officer u Dr BDR Tiwari ha ka sngi Ba-ar, da kaba maham ba kito ki bym lah ban pynbiang ïa ki phom shwa ka por ba la buh kin nym paw ha ka Draft Electoral Roll ka ban pynmih ha ka 5 tarik u Nailur.
Da kaba sah sa tang shi sngi ban pyndep ïa ka jingsam bad ka jingpynlong digital, u Dr Tiwari u la ong ba la bthah ïa baroh ki Ophisar Booth Level ba kin pynbiang mardor ïa ki longïing kiba dang sah.
Katkum ka jingpynshisha ba la pynmih ha ka 28 tarik u Naitung, ki don haduh 1,49,656 ngut ki nongthep vote, lane 6.37% na ki 23,49,645 ngut ki nongthep vote jong ka jylla, ki la shah buh dak hapoh ka kyrdan Absent, Shifted, Death and Duplicate (ASSD)
Kane ka kynthup ïa ki 74,851 ngut kiba ïap, 37,914 ngut kiba la kynriah jaka, 28,826 ngut ki bym don, 5,899 ngut kiba shah pynrung arsien, bad 2,166 ngut kiba la kyntait.
Nalorkata, 2, 24, 435 ngut ki nongjied, lane 9.55% na ki nongthep vote, ki hap ha ka kyrdan ‘No Mapping’ bad ki donkam ban pynshisha shuh shuh.
“La kyntu ïa ki nongthep vote ki bym pat aiti ïa ki phorm ba kin leh mardor da kaba aiti noh sha ki BLO jong ki lane lyngba ka jingkheiñ hi dalade ha ka ECINET App ne Portal,” ong u CEO.
U Dr Tiwari u la pynshai ba baroh ki case jong ka ASSD bad ka jingkyntait yn sa leh pyrkhing katkum ka Registration of Electors Rules, 1960, hadien ba la pynshisha bha bad hadien ba la ailad ïa ki nongjied ne kiba haïing hasem jong ki.
Haba ka SIR ka la rung sha ka bynta kaba khatduh, u CEO u la kyrpad ïa baroh ki nongjied kiba dang sah ba kin ïashim bynta khnang ban pynthikna ïa ka Electoral Roll kaba khuid, kaba thikna bad kaba kynthup lang ïa baroh.
Ka jingleit na kawei ka ïing sha kawei pat ka ïing jong ka SIR 2026 kan kut ha ka 29 tarik u Naitung.