Mairang, K’lyngkot , 08: U MDC jong ka UDP na Mawthadraishan, u Bah Jambor War, u la kam ba kumba 60 percent na ki nongthep vote jong ka Mawthadraishan Constituency kidei ki nongkyrshan jong ka Seng UDP.
Haba ai jingkren ha ka jingïalang paidbah jong ka UDP Mawthadraishan Circle kaba la long ha ka sngi Palei ha Kynshi, u General Secretary ka UDP Mawthadraishan, u la ong ba katkum ki form ba ka Seng ka la phah sha ki Primary Unit ban pyndap ïa ki kyrteng jong ki nongkyrshan, la shem ba ki don haduh kumba arphew ar hajar ngut ki kiba la pyndap bad kata ruh ka long tang ha ki 9 tylli na ki 11 tylli ki Zone ba ka Party ka la phiah ha Mawthadraishan Constituency.
“Kane ka pyni ba ka UDP ka ïoh ka jingkyrshan kaba khlaiñ bha na ki paidbah badkaba sah 40 percent ki mat ïasam hapdeng kiwei pat ki Party”, u la ong.
Ha kane ka jingïalang, u Bah Jambor u la ther ruh ïa ki nongïalam kiba la mih noh na ka UDP ban leit pynïasoh sha ka HSPDP, da kaba ong ba uwei na kine ki nongïalam haba kren ha ka jingïalang ka UDP ha Markasa ha ka elekshon MLA 2018, u la ther tyngeh ïa u Bah Ardent Basaïawmoit ha ka por ba u wan ïalap elekshon ïa ka kyrtong ka HSPDP, da kaba ong ba kumno u briew uba nabar u wan batai stad ïa ki kam ha Mawthadraishan. Hynrei mynta kine kijuh ki briew kiba la mih noh na ka UDP ban rung sha ka HSPDP ki la leit khot syndon da u briew ba nabar Constituency ban wan ïakhun na Mawthadraishan.
“Kine ki rangbah ki la mih noh na ka UDP ym dei namar kaei kaei ruh, hynrei namar ka daw shimet jong ki hi, namar ba kim shym la wanrah hakhmat ka Executive Committee jong ka Seng ïa kita ki jingeh ba ki don bad ka Seng”, u la ong.
U la pynkynmw ba kine kijuh ki rangbah kidei kiba la pynïasoh shuwa bad ka Seng NPP ha Shillong, hynrei tang hadien shi bnai tam ki la leit pynïasoh pat bad ka HSPDP, kaba pyni ba ki leh kumne tang ban myntoi shimet ym ban myntoi ki paidbah.
