Haduh 54 tylli ki constituency ngi la poi final : Kob u President NPP
Yn shah pynduh tiket haduh 3 ngut ki MLA NPP
Shillong, Naiwieng 19 : Kin don haduh kumba lai ngut ei ei ki MLA jong ka National People’s Party (NPP) kiban shah pynduh tiket ha ka party ha ka jingpynkhreh jong ki na ka bynta ka elekshon MLA kaban long ha u snem ban wan ha ka jylla.
Haba pyntikna ïa kane, u President jong ka National People’s Party (NPP) Dr. WR Kharlukhi ha ka sngi Saitjaiñ u la ïathuh ba ka daw ba don ki daw kiba pynlong ïa ka party ban ym ai tiket shuh ïa kitei ki lai ngut bad mynta ki la sdang ban leit pan tiket noh na kiwei pat ki party.
Utei u hehduh ka party ha Meghalaya ba dei ruh u MP jong ka Rajya Sabha u la pyntip ruh ba ki la don haduh 54 tylli ki constituency ba ka NPP ka la tikna ba kan poi shaduh ka final. “Haduh 54 tylli ki constituency ngi la tikna ba ngin poi ïakhun bad kiwei pat ki party,” u la ong.
Da kaba pynpaw ïa ka jingkyrmen ba ka NPP ka don ruh ka lad ba kan synshar marwei u Dr. Kharlukhi ula ong pat ba kane ka shong pat ha ka bor jong u paidbah kaei ka rai ba un ai ha ka sngi thep vote. Da kaba kyntait ban kren ei ei halor ka jingïateh paralok ban ïatrei lang hadien ka elekshon, u Dr. Kharlukhi u la ong ba haduh mynta hi, ka party ka don ka jingkyrmen ba kan synshar hi marwei ha ka jylla.
“Hynrei kane ka shong ha ka rai jong u paidbah ha ka elekshon,” u la bynrap biang.
Katkum ka jingong jong u, na kitei ki 54 tylli ki constituency, bun kidei kiba ka party ka don jingkyrmen ban poi sha ka thong. U ong ruh ban ïoh ïa ka jingkyrshan jong u paidbah kum ka party hi ki hap ban leit pynsngewthuh kylleng ïa ki kam ba kane ka sorkar bad kum ka party ka la ïakhun ha kine ki snem baroh.
Nalorkata, ha kane ka sngi, utei u President ka party u la pyntip ruh ba ki don haduh 8 ngut ei ei ki MLA na kiwei pat ki party kiba thmu ban pynïasoh sha ka party ha kine ki khyndiat por ban wan. Kumba long haduh mynta hi kiba la kham paw kyrteng shakhmat ban wan pynïasoh sha ka NPP ki long naduh u MLA ka Mylliem, MLA ka Sohiong, MLA ka Shillong West, MLA ka Shillong East, MLA ka Rambrai nalor katto katne na rilum Garo.