Haduh 5 lak tyngka ai jingïarap u Myntri Sports ïa nongïalehkai Muaythai ban leit aireng sha Abu Dhabi

Shillong, Jymmang 25 : U Myntri ba dei peit ïa ka tnad Ïalehkai jong ka sorkar jylla, Bah Banteidor Lyngdoh u la ai haduh 5lak tyngka bad ruh ban pynsiew ïa ka bai liengsuiñ na bynta na Guwahati sha Abu Dhabi bad ruh kumjuh ynda la wanphai na katei ka ri sha Guwahati na ka bynta san ngut ki nongïalehkai ka jylla kiban leit shim bynta ha ka World Muaythai Championship kaban long ha Abu Dhabi naduh 26tarik u Jymmang haduh ka 05tarik u Jylliew, 2022.
Kitei ki nongïalehkai ki kynthup naduh u Pynnehbor Mylliemngap ha ka thup kiba 23 snem shajrong (48kilo), Blaseibok Kharbuli na kiba hapoh 23 snem ha ka thup kiba 48 kilo, Skhemborlang Marweiñ hapoh ka thup ba hapoh 23 snem (54 kilo).
Kane ka kynthup ka kynthup ruh naduh ki referee bad ki nongbishar kiban mihkhmat na ka UMAI kum ki International referee & Judges ba kynthup ïa Pynsuklang Sumer, Angelus Sun ba dei ruh u President jong ka Muaythai Association of Meghalaya.
Na ka liang u President, Bah A Sun u la pynpaw ïa ka sngewnguh halor ka jingsbun mynsiem u Myntri ban kyrshan ïa kitei ki nongïalehkai kumjuh ruh ïa ka Director jong ka tnad Ïalehkai.