Ka Aam Aadmi Party lane ka Seng Saiñpyrthei u Paidbah ka dei ka seng kaba la pynkha ha u bnai Naiwieng, 2012 da u Arvind Kejriwal bad ki katto katne ki paralok jong u ban ïakhun thma pyrshah ïa ka bamsap ka bampong hapoh ka ri India lyngba ka saiñpyrthei. Ïa kane ka seng saiñpyrthei la pynkha lyngba ka jingïakhih pyrshah ïa ka bamsap ha u snem 2011 kaba la tip paidbah kum ka Anna Andolan.
Dei lyngba kane ka seng saiñpyrthei, u Arvind Kejriwal u la jynrat ïa ka Seng Congress kaba la bat ïa u lakam synshar ha Delhi ha kito ki snem bad ka jingtrei hok jong u Kejriwal ka la pynlong ïa kiwei pat ki jylla ban phaikhmat sha kane ka Seng Saiñpyrthei kaba la buh thong hakhmat eh ban rat dyngkhong ïa ka bamsap ka bampong.
Ka Aam Aadmi Party hapoh ka jingïalam jong u Bhagwant Mann ka la pynkhyllem ïa ka Sorkar barim ha ka Jylla Punjab bad ka kam kaba u Bhagwant Mann u la leh ka long ban pyni nuksa ba ka bamsap ka bampong kam don jaka satia hakhmat ka Sorkar jong u.
Kawei na ki nuksa kaba u Bhagwant Mann u la pyni hakhmat kiwei pat ki Sorkar Jylla jong ka ri India ka long da kaba sloit ïa u Vijah Singla na ka shuki Myntri hadien ba la lap mardor ba u la donkti ban dawa ïa ka bai sha kaba 1 percent na ki kam ba la thep tender.
Kane ka kam sop sop jong u Singla kaba la poi sha ki tyndong skhor jong Mann ka la pynbitar lep kat haduh ba u la shim syndon da ka rai kaba tyngeh ban bthah ïa ki Pulit ka Punjab ban kem bad ban set along shisyndon ïa une u Myntri.
Ka jingshim rai da u Myntri Rangbah ka jylla Punjab ban sdang ïakhun ïa ka bamsap na ka Kynhun Myntri ka la pynlong ïa ki paidbah ka jylla Punjab bad ïa ka ri India baroh kawei ban thap kti bad ban ïaroh ïa u Mann.
Kane ka nuksa kaba u Bhagwant Mann u la pyni hato kiwei pat ki Myntri Rangbah jong kiwei pat ki jylla ha ri India khamtam eh ha kane ka jylla Meghalaya ki nud neem ban shim ïa kane ka sienjam lane ki shlur tang ban shu pynshai hakhmat ki lad pathai khubor manla ka sngi ban tap eitmiaw la ka iwtung.
Haba phai pat sha kane ka jylla Meghalaya, kawei hadien kawei pat ki jingkynnoh bamsap ki la paw pylleiñ na kawei ka sngi sha kawei pat hynrei haduh mynta kine ki jingkynnoh bamsap ki shu kut tang ha ki jingïakawang kti bad ka jingshah kdew kti tang ha ki rynsan jong ka Social Media bad tang ha ki lad pathai khubor.
Lada ïakren ïa ka jingkynnoh bamsap ha ka MeECL, ha ka jingshalan tuh ïa u dewiong, ka jinglum pisa be-aiñ ha shilynter ka surok bah bad ha kiwei kiwei de ki jaitkam la shem ba ki shu kut tang ha ka jingkren. Naduh ba ka kynhun Meghalaya Democratic Alliance (MDA) ka la shimti ïa u lakam synshar ha kane ka jylla Meghalaya hapoh ka jingïalam jong ka National People’s Party (NPP) ki bun sa tang ki jingkynnoh bad ki jingkynthoh ba laiphew jait bad laiphew rukom.
Ki jyrsieh bamsap ki paw na kawei na ka sngi sha kawei pat ka sngi hynrei haduh mynta ym pat don satia wat tang uwei ruh u briew ne ka briew ka ban ngat ha ki kynjri nar jong ka aiñ. U ba ngat dei tang u nongtuh tape kali uba kyrni dih droks. Shaei ka lawei jong ka jylla Meghalaya lada ka la long ha kane ka dur. Lada tuh uba deng Tie ym ju shah kem katba lada tuh u rit u ria tang katta ynnai ïakren shuh.
Ka jingdon jong ka Lokayukta hapoh ka jylla Meghalaya ka dei kawei na ki lad kaba ki paidbah nongshong shnong ki dei ban shim kabu bha lada ki ïatakhuh bad kino kino ki ophisar dawa bai sha lane bad ki Myntri Sorkar kiba dawa baisha. Ban rat dyngkhong ïa ka bamsap ka bampong, ka dei shwa ban sdang na u paidbah ba bun balang hynrei lada u paidbah u shu sngap bad um phah ujor eiei ki nongbamsap kin nang ïai bam shi ïai bam.
Ka jingshah kdew kti bad ka jingshah kynnoh bamsap jong ka Sorkar MDA hapoh ka jingïalam jong ka NPP ka la long thik kumba thad jaiñ ha sainar. La katta ruh, u Myntri Rangbah ka Jylla bad u Symbud Myntri Rangbah ki kloi ban long ki lang saitpap bad ban darapjot ba ka Sorkar kam lah ban pdiang ïa ki jingkynnoh khlem ki sakhi sabut.
Ha kane ka juk stad mynta, u paidbah u paidbah uba bun u shu peit kai ïa ki jingleh khun jakai jong ki lei san snem kiba shisien ka sngi ynda la poi ka aiom jied syiem kin sa leit mane ïa u paidbah da kren ïa ki tien jali jaum bad ban thong ruh da ki sbai rupa tang ban ïoh kiew khet na ka bynta shi samoi.
Lada u paidbah un dang biej jakle ban shah thied ha ka lut san spah bad ha ka lut ar hajar khlempep ka lawei kaba dum ka la ap lypa ïa ka jylla kumba ki paidbah ki la mad ha kine ki snem ba la leit noh.
