Sei madan u Dr. Mukul ïa ki kot ki sla ba tohkit ka CBI ïa ka Kompeni ba shna ïa ka Assembly

Shillong, Jymmang 24: U Nongïalam ka Liang Pyrshah, u Dr. Mukul Sangma, mynta ka sngi, u la sei madan ïa ki kot ki sla kiba pyni ba ka ka Kompeni ba la ïoh kontrak ban tei ïa ka ïingdorbar Thawaiñ ha Mawdiangdiang, ka Rajkiya Nirman Nigam Ltd na Uttar Pradesh, kadei kaba la shah peit siar ne shah tohkit ha ka CBI.
Kine ki kot ki sla ki pyni ïa ka shithi ba la thoh da ka CBI sha u BN Tripathy, IPoS, CVO halor ka rukom siew pisa jong ka Rajkiya Nirman Nigam Ltd na Uttar Pradesh bad kumjuh ruh kane ka shithi ka la thoh sha ka Kompeni M/S Design Associates, kaba dei ka Kompeni kaba la design ïa kane ka ïingdorbar Thawaiñ jong ka jylla Meghalaya, ha kaba ïadei bad ka jingtrei ïa ki 20 tylli ki Projek kiba shong dor 3755 klur tyngka.
“Nga, nga shu pyni ïaphi kine ki kot bad kadei kamram jong phi ki nongthoh khubor ban tohkit bniah”, la ong u Dr. Mukul.
Halor kane ka jingkhyllem ka Dome ha ïingdorbar Thawaiñ ha Mawdiangdiang, u Dr. Mukul, u la ong ba kane ka jingjia kadei ban pynkyndit thiah ïa ki bor sorkar ba haman la ki jingtrei ne ki jingtei ïa ki projek bapher bapher dei ban don noh da ka bor ka ban peit bniah ne peitngor, khnang ban kan nym don kano kano ka jingleh buih tuh ne ka jingtrei torti. “Kane kadei kaba donkam haduh katta katta, ïa kaba nga la ong naduh mynno halor kane”, u la ong.
U la ïathuh ruh ba dei ha ka por ka sorkar jong u, ba la wanrah ïa ka aiñ ban don ka Social Audit ha man la ki jingtrei ïa ki Projek bad ki Skhim ha ka jylla. Hynrei kane ka sorkar ba mynta pat kam shym la buddien ne pyntreikam ïa kane.
Halor ka rai jong ka HPC, u Dr. Sangma, u la ong ba la ïakren bha ïa kane ka kam bad ka rai ka long ban aiti beit ha ka Third Party ne ka bor jingtohkit kaba bym shah liang. Tangba ka jingtohkit kadei ban long kaba shai bad kaba khuid bha, khnang ban lap ïa ka daw tynrai.
Shuh shuh u la ong ruh ba lada trei ïa kano kano ka kam ne ka jingtrei donkam ban bud ryntih ne bud pyrkhing ïa ki jingbthah jong ka Central Vigilance Commission(CVC).