Haduh 25000 yn ai bai rneng ka sorkar ïa kiba pyndonkam kali elektrik, yn mab ruh ïa ka bai pynrung kyrteng

Shillong, Naitung 27: Ka Sorkar Jylla ka la shim ïa ka sienjam kaba thymmai ban pynshlur ïa ki paidbah ka jylla ban pyndonkam lane phaikhmat noh sha ki kali elektrik (Electric Vehicles).
Kumta halor kane, ka Kynhun Myntri ha ka sngi Nyngkong, ka la mynjur ïa ka Meghalaya Electric Vehicle Policy 2026, kaba ai jingïarap pisa haduh 25,000 tyngka bad ka jingmap lut ïa ka bai registration, ban pynsuk bad pynlah ïa ki paidbah ban thied bad pyndonkam noh da ki kali elektrik.
Ïa kane ka rai la shim ha ka jingïalang jong ka Kynhun Myntri kaba la pynïaid da u Myntri Rangbah ka jylla u Conrad K. Sangma.
Haba kren sha ki lad pathai khubor, u Myntri ka Sorkar jylla u Marcuise N. Marak u la ong ba kane ka policy ka thmu ban pynshlur ïa ki nongshong shnong ban pyndonkam ïa ki rukom leit rukom wan kiba khuid bad kiban ym pynjaboh ïa ka mariang.
“Ban pynshlur ïa ka jingpyndonkam ïa ki kali elektrik, ka Cabinet ka la mynjur ban ai jingïarap pisa ne ka bai rnengkaba kot kumba 25,000 tyngka ïa kino kino kiba thied kali elektrik. Nalor kata, yn map lut ruh ïa ka bai registration. Kumta, uno uno uba thied ïa ki kali EV un ïoh ïa ka jingïarap pisa kaba 25,000 tyngka bad ka registration khlem kano kano ka jingsiew,” la bynrap shuh shuh u Myntri.
U la ïathuh ruh ba haduh mynta ka jylla ka la don palat 5,000 tylli ki kali elektrik kiba la ïaid ha ki surok, bad la khmih lynti ba kane ka policy kan pynbun shuh shuh ïa ka jingdon jong kine ki kali.
Katkum kane ka policy, ka jingïarap kan treikam ïa ki ar shaka, lai shaka bad saw shaka ki kali elektrik, hynrei ka rukom ai jingïarap kan ïapher katkum ka jait kali.
Halor ka jingdon ki jaka pyndap bording (charging station), u Marak u la ong ba ka Sorkar kam ïohi ba kane kan long ka jingeh.
“Ki charging point lah ban buh ha kino kino ki jaka. Na ka bynta ki commercial charging station, ngi la dep ban ithuh ïa ki jaka kiba yn sa buh ïa ki,” u la ong.
U la ïathuh ba ka Kynhun Myntri ka la ïakren ruh halor ka Vehicle Scrappage Policy jong ka jylla kaba la pynbna naduh u snem ba la dep. Katkum kane ka policy, kino kino ki trai kali kiba pynduh noh ïa ki kali kiba la palat 15 snem bad pyndonkam ïa ka certificate ban thied kali elektrik ba thymmai, kin ïoh sa kawei pat ka jingïarap pisa.
Da kaba kdew ïa ka jylla Assam, u Myntri u la ong ba ka jylla ba marjan ka la kham kiew sted ha ka jingpyntreikam ïa ka vehicle scrappage policy.
“Ha Assam, ki scrappage station ki la treikam lypa. Ha Meghalaya pat kane ka policy ka dang thymmai, kumta ka jingpyntreikam ka dang sdang. Ynda phi pynduh noh ïa ka kali kaba rim bad ïoh ïa ka certificate, phi lah ban aiti ïa ka sha ka District Transport Office (DTO) bad pan ïa ka jingïarap pisa,” u la batai.