Lada ym pynbeit ngin ym ailad ban pynlong ïa ka eksam, byrngem ka HYC ïa ka State Mission Authority

Shillong, Naitung 27: Ka Hynñiewtrep Youth Council (HYC) Sengkmie hapoh ka jingïalam jong u President u Bah Roy Kupar Synrem ka la leit ban kynduh ïa u Officer on Special Duty on SSA SEMAM kaba dei ka State Mission Authority u Dr. Andrew Warjri halor ka jingthungkam ïa ki 12 tylli kita ki Fellowship ba la pynmih da ka sorkar jylla kaba la tip kum ka CM-LEAD Fellowship na ka bynta ki 12 tylli ki kam ha kaba ka jingthmu jong ka sorkar ïa kine ki post ka long ba kin hap ban don ha manla ki district jong ka jylla ba kin ïatreilang ryngkat bad ki tnat treikam jong ka sorkar kumno ban pynthikna ba ki skhim sorkar haba ïadei bad ka tnat pule puthi yn pyntreikam lane lada lap ïa ki jingduna kine ki 12 ngut kin long kum ki nongai khubor sha ka sorkar.
Hynrei kaba lyngngoh pat ka long ba na kine ki 12 tylli ki post ka tnat ka la bhah sop sop ïa 4 tylli ki post na ka bynta ki briew kiba nabar, kumta na ka liang ka HYC hapoh ka jingïalam jong u President jong ka u Bah Roy Kupar Synrem ka la dawa ïa ka tnat ba kadei ban pynbeit mardor ïa kane ka jingbhah bad ka la byrngem ruh ba lada ym lah ban pynbeit ne ban weng ïa kane ka kyndon ka seng kan pynthut bad kan ym ailad satia ban pynlong ïa ka eksam interview ka ban long ha ka 30 bad 31 tarik mynta u bnai. Shuh shuh u President ka HYC u la ong ba ha u bnai Jymmang ne u bnai Jylliew jong une u snem ka sorkar ka la pynlait ïa ka jingpynbna lait kam na ka bynta jong kine ki 12 tylli ki post kaba la khot ban aplai ïa ki samla kiba la pyndep ïa ki post graduate bad hadien kane ka pynmih ïa ka thup kyrteng ha ka 24 tarik mynta u bnai na ka bynta kitei ki kam ha kaba ki la pynmih ïa ka thup jong ki 50 ngut ki samla ban shim bynta ha ka personal interview ban khot ha ka 30 bad 31 tarik mynta u bnai.
“Ïa kine ki 50 ngut katkum ka jingsngewthuh jong ngi, ki la phah ruh ïa ka email bad ha kane ka email la pynpaw ba kin jied ïa ki 12 ngut bad na kine 8 ngut kin dei na Meghalaya bad 4 ngut pat kin dei nabar jylla bad ha ka advertisement kam shym la don ka jingpynbna ba kan don ka jingong ba na ki 8 tylli yn dei ïa ki trai ri trai muluk bad 4 tylli ïa kiba nabar jylla, na ka liang ka seng ka pynpaw ka jingsngew lynngoh halor ka jingpynbna ba la wan da ka email sha ki kyrtong ba la dep buh lypa ïa 4 tylli ki post ïa ki briew kiba nabar,” ong u Bah Roy.
U la ong ba ka CM-LEAD Programme ka dei ka prokram jong ka sorkar jylla, ka pisa la bei da ka sorkar jylla kumta ym lah ban sngewthuh kaei ka nongrim kaei ka daw ba ha ka por ba ki phah ïa kane ka email halor ka jingbhah ïa ki post bad dei halor kane ba ka seng ka la wan ban kynduh ïa u OSD ban phah ïa ka shithi sha u Myntri Rangbah ka jylla lyngba jong u ban ong ba dei ban wengnoh mardor ïa kane ka kyndon kaba la buh bhah ïa ki kam.
“Ka sorkar jylla ka dei ban sngewthuh ba kum kine ki projek kiba dei ba la bei pisa da ka jylla dei ban aikam ïa ki samla ka jylla bad lada ka buh ïa 4 tylli ki post na ka bynta kiba nabar jylla ka buh ka jingkylli ba haduh katno ka jylla jong ngi ka kyrduh ïa ki samla kiba la bit ban trei ïa kane ka kam fellowship kaba dei ka kam kaba ki hap ban leit sha ki thaiñ nongkyndong ban sngewthuh ïa ki jinglong jingman jong ka jylla jong ngi, kumta donkam ban thung beit da kiba napoh ka jylla, u briew uba nabar jylla kumno un tip ïa ka jingeh jong ki briew ka jylla, tang na ka ktien ka thylleij ruh la ïapher lypa,” ong u President ka HYC.
Ka HYC ka la pynpaw ruh da kaba ong ba ki dang bun ki khun samla trai ri trai muluk kiba la long kiba la tbit hynrei kim donkam donjam, hynrei shah pynduh mynsiem pynban ha ka sorkar da kaba wanrah ïa ki briew kiba nabar.
“Ka jingïakynduh ka jong ngi bad u OSD uba peit ïa kane ka jingthungkam ha kaba nyngkong eh u la ong ba um don jingtip bad u la ong ba kam don kum kata ka email ne kano kano ka rai ba la bhah 4 tylli ki post sha kiba nabar na ki 12 tylli kiba la pynmih jingpynbna hynrei hadien ba la pyni pat ïa kane ka email ba la phah, u OSD u la ong ba ïa kane la don baleh bakla mano re mano khlem ka jingtip jong ki, kaba mut ba u la ngeit bad kubur ba ka don ka jingleh shalak jongno re jongno ban phah ïa kane ka email sha kiba wad kam, khlem ka jingtip jong ka ophis, kumta u la ong ba ïa kane khlem da mynjur da ka tnat Pule puthi bad u la ong ba kane kadei ka jingbakla bad ka jingleh stad jongno re jongno, kumta ka seng ka lada dawa badei ban pynbeit noh ïa kane lem kumta ka seng kan ym ailad ban pynlong ïa ka eksam ha ka 30 bad 31 tarik mynta u bnai bad na ka liang u OSD u la ong ba un sa shim khia ïa kane ka kam bad u la pan por ban pynbeit ïa kane ka jingeh,” bynrap u President ka HYC.