Shillong, Nailur 21 : Ki la don haduh 1520 ngut ki briew kiba shah kem bad 50 ngut pat kiba la shah rai pynrem halor ka jingdonkti ha ki kam khaii drok haduh mynta, pyntip u Symbud Myntri Rangbah ka jylla, Bah Prestone Tynsong ha ka jubab ba wanrah ha Iing Dorbar Thawain ka jylla ha kane ka sngi Palei.
U la ïathuh ruh ba ka sorkar ka la shim ïa ki sienjam na ka bynta ban pyntikna ba kito kiba donkti kin shah rai pynrem.
Shuh shuh u la pyntip ruh ba ki la don ki SOP ban ïoh phah biang bor ïa ki nuksa sha ka FSL (forensic science laboratory) bad ruh ka jingïoh biang por ïa ka kaiphod jong ka FSL da kaba ong ba kane kan ïarap ban pynkhreh pynngat kyndon ha ka por kaba biang.
U Symbud Myntri Rangbah u la pyntip ruh ba ka Directorate of Forensic Sciences ha Mawdiangdiang la dep ban kyntiew kyrdan ïa ka jingtest da kaba wanrah ïa ki mashin kiba kham biang, GCMS Thermo Fisher injection machine kaba ïadei bad u drok bad ki kynja jingdih ba hap ha ka thup NDPS. La kdew ruh ba kane ka jingwanrah da ki tiar kiba kham biang kan ïarap ban ïoh kham kloi ïa ki kaiphod FSL.
Haba jubab pat halor ki sienjam pyrshah ïa kito kiba ju mlien man ka por, u Bah Prestone u la ong ba hapoh ka kyndon jong ka PITNDPS Act, 1998, ki pulit ka jylla ki lah ban shim ïa ki sienjam ïa kito ki briew kiba ju mlien ïa kitei ki jait kam na ka bynta ban tehlakam.
