Kyntait ka Assembly ïa ka Resolution ban pynkhlaiñ jingtreikam ka Land Transfer Act

Shillong, Nailur 21: Ki artylli ki Resolution, kawei halor ka jingpynkhlaiñ ïa kajingtreikam ka Land Transfer Act 1972 ba la wanrah da u Bah Ardent Miller Basaïawmoit, MLA ka VPP bad kawei pat ka halor ka jingpyrshah ïa ka Uniform Civil Code ba la wanrah da u Bah Charles Marngar, MLA ka Congress, ki la shah kyntait hapoh ïing Dorbar lyngba ka Voice Vote
Ka Resolution bala wanrah da u MLA VPP na Nongkrem Bah Ardent M Basaiawmoit, ba dawa ban sangeh noh ïa ka jingpynkheiñ ïa ki kyndon ka Meghalaya Transfer of Land Regulation Act, 1972, kala shah pynliem da ka voice vote hapoh ka Iingdorbar Thaw Ain, hynne ka sngi Palei.
Ïa kane ka Resolution la wanrah sha ka jingïavote hadien ba u Bah Ardent ula pynbna ïa ka rai ban nym weng satia ia ka Resolution da kaba pynpaw ba um pat hun satia ïa ka jubab jong ka Sorkar Jylla.
U Bah Ardent ula ong ba ka don ka jingpynkheiñ ïa ka Act hynrei ka Sorkar kam kwah ban pdiang ba ki briew ki bym pat shah kdup ha ka Land Transfer Act, kila ïathied jaka pathar ha Ri-Bhoi District.
“Kumno ki lah ban thied jaka haba kim dei ki nongshongshnong ka Meghalaya?. Kaei kaba ka Sorkar kan leh pyrshah ïa kine ki briew bad khang ïa ki ban thied ia ki jaka ha Ri-Bhoi?” ula buh jingkylli.
Ula kyntu ruh ia ka Sorkar Jylla ba kan pynmih ia ka public notice halor ka jingbatai ba bniah ia ka jingmut ‘riewlum’ (Tribal).
Haba ïatai halor kane ka mat u Bah Ardent u la kdew ba ka jingwanrah ka sorkar ia ki amendment ha ki snem kiba la dep ka la pyntroiñ ïa ka bniat jong kane ka aiñ kaba long ha ka jingshisha ka stieh Ïada ïa ka hok longtrai ïa ka ka khyndew da ki jaidbynriew riewlum trai muluk ki Khasi bad Garo bad kum juh ki Rabha.
Shuh shuh u la kdew ba ka la donkam ïa ka sorkar ban wanrah ïa ka aiñ ne ka rukom ban khang lad ïa ka thied jaka tang da ki heh spah katba kiba duk pat kim ïoh jaka tang shi lyngkhot ban shna ïa ki ïing ki sem jong ki na ka daw ba ki heh spah ki thied jaka ha ka dor kaba rem.
U la kdew ruh ia ka jingpynkheiñ ïa ka land transfer act ha kaban ai jaka ïa ki officer IAS ha New Shillong Township ha ka dor ba 1 tyngka shi square foot bad kumjuh ka jingdie ruh sha ki bym dei ki riewlum trai muluk da u Syiem ka Raid Marwet.
Lah ban ïohi haba u Bah Ardent u dang kren u CM u la ïeng ban rah ïa ka point of order da kaba kdew ba u Bah Ardent u shu pule ïa ka jingkren jong u kaba long pyrshah ïa ka rule book ka assembly, hynrei u Bah Ardent u la kyntait ba u shu pule pynban u ong Bah u pyndonkam tang ban peit ïa ki data namar um lah ban kynmaw lyndet lut ïa ki number.
Haba shim bynta ha ka jingïatai wat la um kyrshan ïa kane ka Resolution u MLA ka Mawkyrwat u Bah Reniton Tongkhar u la ong u sngewdei ban ka sorkar ka dei ban wanrah da ki aiñ ban shim ki lynti ba kane ka aiñ kan ym long ka maw jynthud ïa ka roi ka par.
Myntri Rangbah Conrad K Sangma, haba ïarap jubab lang na ka bynta u Myntri ka tnad Revenue, ula ong ba kam shym la don satia ka jingpynkhein ïa ka Land Transfer Act. “Baroh ki kam (ba iadei) ki bar jylla ki dei kiba la pynshong nongrim kat kum ki kyndon ka Act” ula ong.
U Conrad ula ong ba kino kino ki briew ki lah ban leit sha ïingkashari lada ki don ka jingsngewkhia ba ka don ka jingpyn kheiñ ïa ka Act. U Myntri Rangbah ula kular ruh ba ka Sorkar kan sa shong bishar ia ki jingai jingmut bala ai da u Dkhot halor kumno ban nang pynkhlain ia ka Land Transfer Act.
Shuwa kane, u Myntri ka Tnad Revenue & Disaster Management Kyrmen Shylla ha ka jubab ula ong ba kala shai ba ka Sorkar haba pynïaid ïa ki kam ba ïadei bad ka transfer, mutation, mortgate, will bad kiwei kiwei, ka ju ïaid kat kum ki kyndon bala buh ha ka Meghalaya Transfer of Land Regulation Act, 1971 9Act 1 of 1972) bad ka Meghalaya Transfer of Land Regulation Rules, 1974.
“Haduh mynta, kam pat ju don ka jingpynkhein ia ka Ain kaba la wan sha ka jingtip jong ka Sorkar” ula ong.