Shillong, Nailur, 21: Ka jingbym pat aiti jong ka tnat PWD ïa ka building jong ka Block Institute of Teacher’s Education (BITE) bad ka Residential School kiba don ha ka shnong Byndihati, East Jaiñtia Hills District sha ka tnat Pule Puthi ka la pynlong ïa kine ki shlem pule kum ki iing jah bad ki ktem leh kam sniew jongno re jongno.
Ka Khasi Student Union (KSU) East Jaiñtia Hills District Unit lyngba ka Education Cell ha ka sngi Baar ka la hiar jurip ïa ki building BIET bad ïa ka Residential School kiba don ha ka shnong Byndihati ban lap da la ki jong ki khmat shwa ban pynsngew sha ki bor ba dei peit jong ka tnat Pule Puthi ka Sorkar Jylla.
Ha ka sngi Palei, ka seng hapoh ka jingïalam jong u Publicity Secretary u samla Hame Ryngkhlem bad u Assistant Organising Secretary u Samla Chibait Rymbai ki la leit ban ïakynduh ïa ka Director jong ka DERT ka Kong K. R Manner ban pan jingpynshai halor ka jingbym lah ban plie noh ïa ka building BIET bad ka Residential School ha ka shnong Byndihati.
Ka seng ka la ïoh jingtip ba ïa ka building BIET ba la shna khnang ban pyntbit ïa ki samla pule kiba thmu ban long nonghikai ka sdang naduh u snem 2012 bad la sdang ban shna ïa ka ha u snem 2015. Ka seng ha ka jingjurip ka la lap ba ka building ka la shu sah khongreng haduh mynta bad kane long ka daw ba ka PWD kam pat aiti ïa kane ka Building sha ka Directorate of Educational Research &Training (DERT) ban pyntreikam pura.
Kum ba la ïoh jingtip da ka seng, ka jingbym pat treikam ïa kane ka shlem ai jinghikai ïa ki nonghikai ka long na ka daw ba ka tnat PWD (Buildings) kam pat ïoh ïa ka Bill kaba kot kumba 3 klur tam na ka Sorkar. “Kaei kaba pynglyngngoh ïa ka seng ka long ba ïa kane ka Building ka ladap phra snem hynrei ka Sorkar ka dang sngap mynthi halor kane ban pyllait noh ïa ka Bill,” la ong ka seng.
“Kaba sngewlyngoh pat sha ki wei ki distrik kiba don ka jaka pyntbit ai jinghikai DIET ki la ïoh ka jingïarap da ki 15 klur tang na ka bynta ban maramot bad kane ka pynlyngngoh ïa ka seng ba kumno ka Sorkar ka leit shiliang ïa ka bhah bad ïa ka East Jaiñtia Hills pat la ieh khunswet watla ka building ka la don phra snem pura. Kane ka pyni ba ka Sorkar kam patiaw satia ïa ka bha ka miat jong ka East Jaiñtia Hills District khamtam ha kaba ïadei bad ka pule puthi,” la bynrap u kyrwoh na ka Seng.
“Ka seng ka kyntu ïa ki Nongmihkhmat bad ïa ka sorkar ba kam dei ban leh shiliang. Na ka liang ka Director ka la batai ruh ba kitei ki building ki dei tang ba bynta ka Block Institute of Teachers Education (BITE) bad lada ïoh ïa ka mang tyngka kaba pura yn sa lah ban pynkylla sha ka District Institute of Teachers Education (DIET) jong ka district,” la ïathuh ka Seng.
Ka seng ka la pyntip ruh ba ka Residential School Building ka la kylla iing jah bad shu iehshrah bad ka long kumba pynseiei kai ïa ka pisa jong u paidbah. “Ngin sa leit ban ïakynduh ïa ki bor ba dei khmih halor ka Residential School ban pan jingpynshai halor ka jingbym lah ban pyntreikam ïa ka Residential School haduh mynta,” ong ka seng.
“Ka Director ka la kular ban leit jurip ïa ka jinglong jingman jong kane ka Building ha kine ki sngi ban wan bad ka la kular ruh ban phah pynkloi noh ïa ka tnat PWD (Building) ban aiti noh ïa kane ka Building sha ka DERT khnang ban pyntreikam noh ïa ka,” la pynkut ka seng ïa u kyrwoh.
