Shillong, Nailur, 21: Ka bai rung na ka bynta ka jingïakob khwai dohkha mynta kan ngat ha ka jingshah oh khajna GST katkum ki kyndon ba la kdew ha ka Central/Meghalaya Goods and Services Tax Act, 2017 bad katkum ka jingpynbeit thymmai na ka por sha ka por, la ïathuh u Myntri ka tnat Taxation u AT Mondal ha ka jubab ïa ka jingkylli ba la wanrah hapoh ka Ingdorbar Thawaiñj jong ka Jylla ha ka sngi Palei.
Ka khusnam pisa ha ka jingïakob khwai ka hap shabar na ki kyndon jong ka GST Act, hynrei, kan ngat ha ka jingshah oh khajna katkum ki kyndon jong ka Income Tax Act, u la ong.
Tang ka bynta ka bai rung (entry fee), 18% (CGST 9% + MGST 9%) katkum ki kyndon ba la kdew ha ka GST Acts, la ïathuh u Mondal.
Katkum ka jingong jong u, ka jingai jingbit na ka bynta ban pynlong ïa ki jingïakob khwai la ai da ki bor synshar distrik.
