Hadien lai snem ba sangeh, 21 bad 22 tarik Ïaiong yn pynlong ïa ka Shad Lakhympong ka Raid Nongtung
Nongpoh, Lber 20: Ka Dorbar jong ki khun ki hajar ka Raid Nongtung, Ri-Bhoi District kaba la long haka sngi Saitjaiñ bala dep, sa shisien kila shim biang ïaka rai ban pynlong biang ïaka lehñiam ‘Shad Lakhympong’ ka jingshad lehñiam jong ka Raid Nongtung ba ju pynlong shisien shisnem, hadien ba katei ka jingshad lehñiam la pynsangeh noh mynta la kumba 3 snem namar ka jingwan lyngshop jong ka khlam Covid-19.
Haba kren sha ki lad pathai khubor mynta ka sngi ha Nongpoh u Bah B Sohtun President ka Synjuk ki Rangbah Shnong Border Area haka jingdonlang u Paiem Miwel Shadap Syiem ka Raid Nongtung, u Bah Aloysius Bina Secretary bad kiwei kiwei ki riew rangbah u la ong ba ïa katei ka Shad Lakhympong la rai ban pynlong haka 21 bad 22 tarik u bnai Ïaiong, ha ka shnong Ummat haka rukom kaba kham pher bad itynnad ha kaba wat ki briew na shabar ka jylla kin wan ban sakhi ïa katei ka jingshad lehñiam.
U la ong ruh ba katei ka jingshad Lakhympong ka dei kaba ju pynlong shisien shisnem ban shim bynta da ki khun ki hajar jong ka Raid Nongtung bala ju pynlong haka taïew ba khatduh u bnai Lber lane ka taiew ba nyngkong u bnai Ïaiong, ha shuwa ba u bynriew ka Raid Nongtung un hiar shaka rep ka riang ban duwai phirat ha u Blei Nongbuh nongthaw ba un ai u symbai ba paka bad ki jingthung jingtep ba kin plung bad san bha, ha kaba naka liang ka Dorbar kala buh ïaka tarik ba nyngkong ban pynlong ha ka 30 bad 31 tarik u Lber hynrei naki daw bym lah ban kiar la rai ban pynkynriah nohïaka tarik shaka 21 bad 22 tarik Ïaiong.
La pyntip ruh ba ka jingpynkhreh pynkhrum naka bynta katei ka Shad Lakhympong kan long kaba itynnad ha kaba yn shna bad pynwandur haka rukom kaba long tynrai kumba la buh da ki longshuwa man shuwa, ha kaba kin don ruh ki jingbam, ki rukom shet tynrai kiba bun rukom bad ki jingthaiñ kti ba ki paidbah ki lah ruh ban iohi ïaka jingriew spah ka kolshor tynrai jong ka Raid Nongtung.
Kumta naka liang ka Synjuk bad ka Dorbar baroh kawei kila khot bad wer ïaki paidbah bad ki paradoh parasnam ban wan sakhi ha katei ka sngi ïa katei ka jingshad tynrai, khamtam ba ki paidbah kin tip ïaki dak ki shin bad ki jaka ha u Lum Mawbah jong ka Nongbah Ummat kaba dei ka jaka khappud ka Meghalaya bad Assam.