Ban pynkhie im biang ïa rep krai, ai jinghikai kyrpang ka JHDS bad NABARD ha Jowai

Jowai, Lber 20: U Krai u dei u wei na ki jingthung mynbarim (indigenous Crop) uba la jan duhjait ha bun ki jaka ha Ri-lum Khasi Jaiñtia, bun na ki nongrep kim da kheiñkor shuh ïa u ne u jingthung ba kongsan bad u ba ïarap ïa ka koit ka khiah ki briew.
Khnang ban kham pynneh pynsah bad pynkhie im biang ïa une u jingthung mynbarim, ka Jaiñtia Hills Development Society (JHDS) ha ryngkat ka jingïatreilang bad ka NABARD bad KVK Jaiñtia Hills, ki la pynlong da ka Workshop ba shisngi halor ka phang “Revival of Millet Cultivation”.
Ha kane ka sngi la ïadonlang ruh katto katne ki riew shemphang kiba khynthup ïa u Bah Grevile Kharlukhi, AGM NABARD, u Director ka JHDS u Fr. Manbha Pakem, U President ka KHUBLEI Germany u Garhart Albert, u Programme Associate ka Caritas India u Sir. Prabal Sen bad kiwei kiwei de ki nongshah khot sngewbha.
Haba kren sha ki lad pathai khubor, u Director ka Jaiñtia Hills Development Society ula ong ba ka Seng ka la pyrshang ban pynkhie im biang ïa une u jingthung naduh ka snem 2018 ha ka shnong Samanong West Jaiñtia Hills District.
Shuh shuh u la ong ruh ba ha kaba sdang ka Seng ka la shem ba don tang lai ïing kiba dang pynneh ïa ka rukom rep ïa une u jingthung ha kane ka shnong da ka jingthmu ban ai bam ïa ki sniang. Hynrei hadien ba ka Seng ka la pynshlur lyngba ki training bapher bapher da kaba hikai kumno ban pynkylla ïa une u jingthung sha ki jingbam bapher bapher kiba lah ban die ha kador ka ba bit, haduh mynta ladon haduh 46 tylli ki longïing kiba la sdang rep biang ïa une u jingthung.
Haba phai sha une u snem 2023, ha kaba ka pynthei baroh shityllup ka rakhe pyndonburom kum u ‘Snem jong u Krai” lane International Year of Millets, U Asst. General Manager ka NABARD u Bah Grevile Kharlukhi u la kyntu bad pynshlur ïa ki nongrep ba ki donkam ban phai biang ïa rukom rep ki mynbarim khnang ban pynneh pynsah ïa ka jingbha bad jingsboh ka khyndew.
Ula ong ruh ba u Krai udei u jingthung uba khlaiñbor bad u bym juh ïap klumar ha ki khiang jingpang lane ka jingkylla ka mariang (Climate resilient). U la ong ruh ba une u jingthung u ïarap shibun ïa ka koit ka khiah ki briew khamtam ha kane ka juk ba mynta. Kumta ula kyntu jur ïa ki nongrep ba kin phai khmat biang sha ka rukom rep mynbarim khnang ban pynneh pynsah ïa une u jingthung ba kongsan.
Ha kane ka sngi la ruh ka jingai jinghikai bad jingbatai ïa ka rukom rep bad ki jingmyntoi kiba lah ban ïoh na u Krai, ïa kaba la ai da I kong Risa Lyngdoh, SMS KVK bad Dr. L. Lyngdoh MBBS.
Hadien kane ladon ruh ka jingpyni nam ïa ki jingbam bapher bapher ïa kiba la shna na u Krai ba la pyni da ki nongtrei jong ka HQI kiba dei ki millets artisan na Shillong bad ruh na ki nongrep jong ka Shnong Samanong.
Ha kaba kut jong ka prokram la don ruh ka jingai sngewbha da ki Symbai Krai ïa ki nongrep ka Shnong Nongjngi bad Khanduli kum shibynta ban pynheh pynkhraw shuh shuh ïa ka jingrep ïa une u Jingthung.