Jowai, Jylliew 11: Ka War Jaiñtia Students’ Union (WJSU) mynta ka sngi 11 tarik u Jylliew, 2026 kala pynshai paidbah lyngba Senior Vice President samla Autumn Sumer bad u General Secretary samla Stalwos Pohkyrnu halor ki kali (trucks) Dkhar kiba wan kamai hapoh ka thaiñ Warjaiñtia .
U samla Autumn Sumer ula pynshai na ka liang ka seng WjSU kam shong kli kti, ka ïai trei shitrhem na ka bynta ka Warjaiñtia halor ka jingjyllei ki truck dkhar.Ka seng ka la leit ai jingthoh bad ïakynduh ïa u EM ka Trade haka jingïadon ryngkat u EM ka Town Committee jong ka Jaiñtia Hills Autonomous District Council.
Ka seng ka dawa bad kyrpad ïa ka Council ban tuklar lem ïa kane ka jingjyllei kine ki truck bad ban leh katkum ki aiñ ki kyndon ka Council ban leh ïa kaba dei.
Ka Council khlem shong kli kti ka la hiar mar mar sha ki thaiñ Dawki ban check ïa kine ki kali dkhar bad sam sha kine ki truck bad la bthah ïa ki ba ki dei ban pynbiang ïa ki trading licence bad kiwei de ki kot ba donkam.Halor kane ka jingtrei bor bah ka Council ka seng ka ai ka jingsngewnguh bad ka jingïaroh sha ki nongïalam ka Council.
Na ka liang u samla Stalwos Pohkyrnu, General Secretary ka seng u sngewlyngngoh ïa kine ki para seng kiba wan ban khynra ïa ki kot ki sla jong kine ki kali dkhar ha ka 10th June 2026 wat haba ka District Council ka la leh ïala ka kamram naduh ka 8th June, 2026.
Shuh shuh u Samla Pohkyrnu, ula ong ba la dep ai jingthoh sha ka Warjaiñtia Truck Owners & Drivers Association Warjaiñtia ban nym leh Shilliang khmat bad ha kaba ïadei bad kine ki kali dkhar, la ong ruh ka seng kam pyrshah ne kyrshan ïa ka jingai ne bym ai trading licence sha kine ki kali dkhar, hynrei la shu bynshet beit katkum ka jingi bit ka truck Association ka thaiñ bad ka seng ka kloi ban ïatreilang bad kane ka Association na ka bynta ka bha ka miat bad ka ïoh ka kot ka thaiñ.
Ula pynpaw kine ki kali dkhar ki wan ban kamai shane lyngba ka jingwanrah ki nongkhaïi jong ngi hi, naduh ba ka judicial intervention ïa ki truck bym don kot don sla, kine ki nongkhaïi jong ngi kim banse ban wanrah da ki kali dkhar. La pynkut ka kyrwoh na u samla Raul Manner uba dei u Joint Publicity Secretary WJSU Central Amlatdoh, Amlarem Civil Subdivision West Jaiñtia Hills District.
