Shillong, Lber 20 : Ka United Democratic Party (UDP) ka la rai ban shong da ka Core Committee ban rai la kin weng ne pynneh ïa u Bah Bindo M Lanong, uwei na ki nongïalam ba slem tam jong ka party hadien ba u la ban ïakhun pyrshah ïa ka party ha kane ka elekshon MLA 2023 na Nongkrem.
“Haba ïadei bad kane, ngin sa ïa kren ha ka Core Committee bad ngin sa ïa pyrkhat ïa kaei kaba bha tam eh,”ong u General Secretary ka UDP, Dr. Jemino Mawthoh haba kren bad ki lad pathai khubor hadien ka jingïalang jong ka CEC ha ka janmiet sngi Nyngkong.
Shuh shuh u ong ruh ba ka sienjam ba kum ka party kin shim kadei beit na ka bynta kaba bha tam kaba ïadei bad ka party watla ki burom eh ïa u Bah Bindo.
“I Bah Bindo idei uwei na ki nongïalam ka party ba la rim bha bad i dei ruh i Chief Adviser jong ka party. Hynrei shwa ka elekshon ka Election Committee ka la i dei ban ai noh ïa ka tiket sha uwei pat u kyrtong ba wan pynïasoh bad ngi, Bah Lambor Malngiang. Te lehse dei na katei ka daw ba i lah ban sngewsih,” bynrap biang u General Secretary.
Lah ban kdew hangne ba u Bah Bindo u la mih ban aireng kum u kyrtong shimet ha kane ka elekshon ba la dep hadien ba ka UDP ka la ai noh ïa ka tiket ha u Bah Lambor Malngiang kum u kyrtong ka party na Nongkrem.
