Hadien bym jop iwei ruh na Garo, yn wad ka UDP ïa ka tynrai

Shillong, Lber 20 : Ka United Democratic Party (UDP) ka la rai ban wad ïa ka daw hadien ba ym don uwei ruh u kyrtong ba jop na rilum Garo watla ki la pynieng la katto katne ngut ha kane ka elekshon MLA kaba dang shu lah shen.
Haba kren bad ki lad pathai khubor hadien ka jingïalang jong ka CEC, u General Secretary ka party, Dr. Jemino Mawthoh u la ïathuh ba wat ha ka elekshon shiteng samoi ha Rajabala, u kyrtong ka party u Ashahel D Shira u la ïoh bun bha kata haduh 7,200 ei ei.
“Mynta pat, ngim tip na kaei ka daw ba ka UDP ka hiar ha rilum Garo. Na ka liang ki nongïalam na Garo Hills ki la wan bad ai ïa ka report jong ki halor kane bad ngi ruh ngi hap ban leh ïa kane ban tip ïa ka daw ba kam da don ka jingpdiang ïangi ha rilum Garo,” u la bynrap shuh shuh.
Da kaba kubur ba ki la don bun ngut bha ki kyrtong ba ka UDP ka la sei ha kane ka elekshon na rilum Garo, u Dr. Jemino u la ong ba ki sngewsih pat ban ïohi ba ka result pat ka long kumtei. “Ngi khlem poi pyrkhat ba kan long kumtei namar ngi la nang pyrkhat ba ngin ïoh katto katne ngut na rilum Garo hynrei na kaei ka daw pat ngim tip ba ka long kumne.”
Katkum ka jingong jong u, katei ka jingialang ha katei ka janmiet ka long ruh ban ïoh pynkhreh pat na ka bynta ka elekshon MDC bad MP kaban sa long ha u snem ban wan.
Haba ïadei bad kane ka elekshon ba la dep, utei u nongïalam ka party u la kubur ruh ba ka jingmih jong ka VPP ka la dei ka dawbah kaba la pynrem bad pynjop ïa ki katto katne ki kyrtong.
Kumban shu pynkynmaw, ka UDP ka la jop 11 ngut ki MLA ha kane ka elekshon mynta ka samoi.