Ha jaka ban pyrshang kren ïa ka ktien jong ngi ki wan kren pynban da ka ktien jong ki: KSU

Shillong. Lber 20: U President ka KSU u Bah Lambokstarwell Marngar ha ka sngi Nyngkong u la pynpaw ïa ka jingsngew bynñiaw bad ka jingsnew pyrshah ïa ka jingpyndonkam u Lat ka jylla u Phagu Chauhan ban kren da ka ktien Hindi hapoh ka Ïingdorbar thawaiñ ka jylla.
“Ka jingwan jong kiwei pat ki jaidbynriew sha ka jylla jong ngi ban long kum kita ki nongpeit nong khmih ïa ka jylla ha ka jingshisha ngi khmih lynti ba kin burom lem ïa ka jingsngew jong ngi bad ba kin pyrshang ban kren ïa ka ktien jong ngi hynrei ki wan shane ban pynriewspah ïa ka ktien jong ki,” ong u Bah Lambokstarwell haba kren sha ki lad pathai khubor.
“Kiba bun hi nongshong shnong jong ka jylla kim dei kiba nang ban kren bad kim sngewthuh ruh ïa ka ktien Hindi hynrei ka jingkren Hindi da u khliehduh ka jylla ka la dei ka jingpeit poh ïa ngi ka jaidbynriew ha ka jingshisha ki dei ban kren da ka ktien ban sngewthuhlang baroh,” u la bynrap.
U la ong ruh ba kine ki jingjia kiba jia na ka por sha ka por ka la dei ka por ba kum ka jaibynriew ka kyndit thiah ban sngwthuh ki mut shano bad shaei kin ïalam.
“Ka la dei ka por ïa ngi ban pyrkhat, ka la dei ka por ba ngin ngam jylliew bad ka la dei ka por ïa ngi ban sngewthuh ïa kine ki jingjia jinglong jingman kiba la jia na ka por sha ka por,” u la ong.