Ka jingkren u Lat da ka Hindi ka pyni ba ka sorkar pdeng kam burom ïa ngi: President KAS

0

Shillong, Lber 20: Ka jingkren lamphrang u Lat Phagu Chauhan da ka ktien Hindi hapoh ïingdorbar ym tang ba la mih ka jingpyrshah na ki MLA ka Seng VPP, hynrei u President ka Khasi Authors Society (KAS), u Dr. DRL Nonglait ruh u la pynpaw ka jingsngew pyrshah da kaba ong ba kane kadei ka jingbym kheiñ snep ka Sorkar Pdeng ïa ki paidbah ka jylla.
Haba ïakren bad u nongthoh khubor, u Dr. Nonglait, u la ba ka Associate Official Language jong ka Meghalaya kadei ka English bad ka Khasi bad Garo, te kumno u Lat un kren da ka Hindi kaba kiba bun kim sngewthuh.
U Dr. Nonglait, u la pynpaw ka jingsngewkhia ba ka sorkar Pdeng ka phah da ki Lat ki bym nang kren phareng, haba kiba bun ki briew shane kim sngewthuh ïa ka ktien Hindi. “Ka sorkar pdeng kadei ban sngewthuh sba shane bun kim sngewthuh ïa ka ktien Hindi bad ka ladei ban phah da u Lat uba nang ban kren phareng”, u la ong, da kaba bynrap ba kiba bun ki Lat kiba don ha ri India kiba nang ban kren phareng.
U la ong ruh ba ka jingshisha u Lamphang ka ïingdorbar u la dei ban pyntip lypa sha ki dkhot ka ïingdorbar ba u Lat un kren da ka Hindi, khnang ba kaba jia kumba la jia mynta ka sngi hapoh ïingdorbar kan nym jia kaba pynduh noh ïa ka akor ka burom jong ka ïingdorbar.
U bah Kyrsoi Pyrtuh u la pynmih da ka jingthoh ha Social Media ban pynpaw ba u Myntri Rangbah ka jylla, u Conrad Sangma bad ka sorkar jong u baroh kawei, kidei ban dawa na ka sorkar pdeng badei ban phah da ki Lat kiba lah ban kren da ka ktien kaba ki paidbah ka jylla ki sngewthuh lang. “Wat ki MLA ruh kiba bun kim sngewthuh ïa ka ktien HIndu, katno tam lei sa ki paidbah ka jylla”, la ong u Bah Kyrsoi. U la ong ruh ba la ju hikai ha ka jylla ba haba don ki jingïalang jong ki paidbah dei ban kren da ka ktien kaba baroh baroh kin ïa sngewthuh.

Leave A Reply

Your email address will not be published.