Shillong, Lber 20 : U Myntri Rangbah ka Jylla Conrad K Sangma mynta sngi , ula ong ba ka jingieit Ri bad Jaidbynriew kan ym suhthied ne khlaiñ lada don pat ka mynsiem isih bad shun ïa kiwei pat.
Ka jingkynthoh u Myntri Rangbah ka la mih hadien ba ki 4 ngut ki MLA ka Voice of the People Party (VPP) ki la mih jyndat na ïing Dorbar ban pyrshah ïa u Lat ka Jylla ba u ai jingkren da ka ktien Hindi ha ka sngi sdang jong ka Dorbar Mang Tyngka ka Jylla.
“Nga kwah ban kren shai ba ngi dei ban kynmaw ba baroh na ngi hangne la ngi dei na kano kano ka jaidbynriew, ne ka ktien ba ngi kren, khlem pep ngi ïeid ïa la ki jong ki briew, ngi don ïa ka mynsiem ieid ri ha ngi hynrei kane ka jingsngew ieid ri bad jingieid ïa la ka Jainbynriew kan ym suhthied lada don pat ka mynsiem isih bad shun ïa kiwei lane ban tan shapoh ïa kiwei lane ban wanrah ïa kum kine ki jingkren ba phim lah ban kren ha kane ka Ktien. Kan ym pynkhlaiñ satia ïa ka jingsngew ieid ri, ka wanrah tang ïa ka jingbym sngewtynnad ka bym ïahap hangno hangno ruh ha ka imlang sahlang jongngi” ong u Conrad haba ïakren bad ki nongthoh khubor hadien ka Dorbar.
“Ban ieid ïa la ki jong ki briew ka dei kawei pat ka kam hynrei ban ieid ïala ki jong ki briew bad shun ïa kiwei, ka dei kawei pat ka pat ka kam. Kane kam dei ka dustur kaba ngi kwah ban ïohi khamtam hapoh ka ïing Dorbar Thaw Aiñ ka Jylla” ula bynrap.
Haba pynpaw ba ka Sorkar kala dep mynjur ïa ka Resolution ban pynrung ïa ka ktien Khasi bad Garo ha ka khyrnit ba phra jong ka Riti Synshar ka Ri, u Conrad ula ong “Ngi dang ïai buddien ha man ki kyrdan, ngi dang ïai bteng ban ïakren bad ki kynhun bapher bapher ban pynthikna ba ki Ktien ki thylliej jong ngi kin kiew ha ki liang bapher bapher”.
U Conrad ula pyntip ba kila don ruh shibun ki jingïakren hapoh ka ïing Dorbar ban wad ïa ki lad kumno ban kyntiew ïa la ki Ktien ki thylliej jong ngi hapoh ka ïing Dorbar ruh bad shibun ki kam ki la nang jam shakhmat ha kane ka bynta.
“Ki don shibun ki lynti ban kyntiew ïa la ka jong ka ktien ka thylliej hynrei ban ibeiñ ïa kiwei kam dei satia ka lynti ban kyntiew ïalade. Namar kata, ngi donkam ban pynthikna ba ki ktien ki thylliej jong ngi kin kiew, hooid ka long kaba kongsan ban pynthikna ba kin tynruh ïa la ki ktien ki thylliej hynrei kumba nga ong ba da kum katei ka rukom pyrkhat ba shun ïa kiwei lane shun ïa kiwei pat ki jait ktien kan ym pynkhlaiñ ïa ka jingangnud jong ngi ban pynkhlaiñ ïa la ka jong ka ktien ka thylliej” ong u Myntri Rangbah.
Nalor kane, u Myntri Rangbah ula ñiew ïa ka jingleh ki MLA ka VPP kum ka jinglehraiñ bad ong “…kam long satia kaba bha bad kam pyni satia ïa ka jinglong ba bha jong ki Dkhot jong ngi bad ka rukom pynïaid ïa ka ïing Dorbar. Nga kwah ban kyrpad ïa ki Dkhot ka ïing Dorbar ba kin nym leh shuh ïa kum kine ki kam. Ki don shibun ki lynti kiba ngi lah ban pynsngew ïa la ka jong ka jingsngew”.
U Conrad ula ong ba ka ïing Dorbar ka la mad ïa ka khep ha ki snem bala leit noh ba u Lat ka Jylla um shym la ai jingkren hapoh ka ïing da ka ktien Phareng bad ka daw tynrai ka dei namar ba u Lat ka Jylla u kham duna ha ka jingnang ban kren ïa kane ka ktien bad ba um lah ban kren ne pule ïa kane ka ktien.
“Ka long kaba bakla ban shu rai kut ba tang namar u briew u kren ha kane ka rukom lane ha kane ka ktien (hindi) ba u ne ka, ki dei kiba ñiewbeiñ ia ki briew jong ngi. Kam dei kaba dei ban pynïasoh ïa kine ki artylli ki mat” ula bynrap.
