23 haduh 25 tarik u Lber, ka National Conference ki Vice Chancellors ha USTM ban saiñdur ïa ka jingnang jingstad
Nongpoh, Lber 20: Kan dei ka sien kaba nyngkong eh ha ka jylla Shatei Lam Mihngi ka ri india ba ka jingïakynduh lang jong baroh ki Vice Chancellor ki skulbah bapher bapher ka ri India kan long ha ka University of Science and Technology Meghalaya (USTM) ha Baridua Khanapara bad kane ka jingïakynduh lang ki Vice Chancellor kan dei ruh ka jingïatrei lang na ka Indian Universities Association ka ban sdang naduh ka 23 tarik u Lber 2023 haduh ka 25 tarik u Lber 2023 ha katei ka skulbah kaba don ha Ri Bhoi District.
Kane ka National Conference ki Vice Chancellor ka dei ruh shi bynta ka 97th Annual General Body meeting jong ki Vice Chancellor ki ban ïa kren halor ka phang kumno ban dang kyntiew ïa ka pule ka puthi hapoh ki jylla bad ka ri hi baroh kawei.
Ha katei National Conference ki Vice Chancellor yn wan shim bytna ruh aduh u President barim ka ri India, u Ram Nath Kovind, uba dei u Chairman u Hon’ble Prime Minister’s Economic Advisory Council, u Dr Vivek Debroy, u Lat ka jylla Assam, u Myntri rangbah ka jylla, u Conrad K. Sangma, u Education Minister ka jylla Meghalaya ha kaba u Secretary General ka AIU, u Dr. Pankaj Mittal u la pynpaw ba kane ka lah ban dei ka jingïakynduh lang jong ki Vice Chancellor kaba biang tam ba la pynlong ha ka jylla Shatei Lam Mihngi ka ri India.
Kumba la pynpaw da u Prof. GD Sharma, Vice President, AIU bad uba dei ruh u Vice Chancellor ka USTM, u la ong ba ka ka thong ba hakhmat eh jong kane ka jingïakynduh lang ki Vice Chancellor ka long ban pynkreh bad ban pynjanai ba kan don ka jingïadei kaba biang tam na ka bynta ban kyntiew ïa ka jingnang jingstad (Higher education) bad ban long ruh ka lynti na ka bynta ki khun samla ba lyngba ka jingnang jingstad kin lah ba kiew ha ka liang ka ioh ka kot bad ki lad aikam ai jam ïa ki khun samla.
Na ka liang u Chancellor ka USTM, u Mahbubul Hoque, u la pynpaw ba kane ka lah ban dei ka sien kaba nyngkong tam ban pynlong kum kine ki jingïakynduh lang ki riew shemphang bad proh jabieng ha kane ka skul bah jong ka USTM bad ka thong hi ka long ban dang kyntiew ïa ka jingnang jingstad ne ka pule ka puthi kiba long ki iktiar ïa ki khun samla ba kin dang kiew shaphrang ha ka pule puthi bad ruh ba kin long kita ki khlur ba phyrnai ban shakri na ka bynta ka ri bad ka jaid bynriew.
Shuh shuh, la pyntip ruh kumba 550 ngut ki Vice Chancellor na kylleng ka ri, kin don ruh ki nongmihkhmat na kiwei ki ri ka pyrthei bad kumba 20 ngut ki Director ka IISc and NITs kin shim bynta ha kane ka jingïakynduh lang na ka bynta ban dang saiñdur ïa ka pule ka puthi bad ban kyntiew ïa ka jingnang jingstad ki khun samla kiba dei katkum ka juk stad ba mynta.