Pdiang burom ka HANM ïa u samla ïakhun MMA ka jylla hadien ba wanphai na Thailand

“Ki samla ki ba don sap ban pyndon kam hok ïa la ka sap bad ban mih shakhmat bad ban wan rah ïaka nam na ka bynta ka ri bad ka jylla baroh kawei”

0

Nongpoh, Lber 20: Ka Hynniewtrep Achic National Movement (HANM) hapoh ka jing ïalam u President ka Eastern West Khasi Hills District u bah Artist Ryntathiang, u Bah Bung Sohpdang President ka Baridua circle ha ryngkat ka jing ïa don lang ki dkhot na seng kmie haka sngi u Blei ki la leit ban shaw bad pdiang burom ïa u samla Obinas Warjri u ba dei u rang ïakhun MMA ka jylla hadien ba u la wan ban ïashim bynta haka lympung 5th International Thai Martial Arts Games and Festival kaba la long naduh ka 12 haduh 17 tarik mynta u bnai haka ri Thailand.
Kum ban shu pynpaw ba u Samla Obinas Warjri naka shnong Pyndeng-umiong, Mairang u la poi shaduh ka thup phainal jong katei ka lympung hynrei u la rem noh haka jingïakhun phainal pyrshah ïa u nong Mexico ban khur pat ïaka takma rupa.
Halor katei ka jingkhur takma rupa jong utei u samla naka liang ka HANM kala pynpaw ka jingsngew sarong kaba khraw halor ka nam bad ka burom kaba u la wanrah ïaka jylla, kaba long ka jingai mynsiem ïa kiba bun ki khun samla ba kim dei ban kynran dien haka sap kaba ki don, hynrei ban tur shaphrang ban minot bad treishitom khnang ba kin ioh kheit ïa u soh ka jingjop.
Na ka liang jong ka seng kala buh ruh ka jingkyrpad ïaka sorkar ba ka dei ban leh eiei ïa kum kine ki khynnah ki ba don sap ban kyntiew ïaki haki ba bun ki liang khnang ba kin ioh ka lawei ba phyrnai, naka liang ka jong u president u la kyntu iaki samla ki ba don sap ban pyndon kam hok ïala ka sap bad ban mih shakhmat bad ban wan rah ïaka nam naka bynta ka ri bad ka jylla baroh kawei.

Leave A Reply

Your email address will not be published.