Hadien ka 10 tarik, lah ban pynbna jingïakhih ka VPP halor ka Reservation bad Roster

0

Nongstoiñ, Jymmang 02: Ka Seng Voice of the People Party (VPP) ka lah ban pynbna sa kiwei pat ki prokram ïakhih hadien ka 10 tarik mynta u bnai ha kaba ïadei bad ka jingdawa ban pynkylla ïa ka Reservation Policy bad ka jingpyntreikam ïa ka Roster System.
Ïa kane la ïathuh da u Bah Ardent Miller Basaïawmoit, President jong ka Seng haba kren ha ka jingïalang paidbah ha Nongstoiñ mynta ka sngi.
Kane ka jingïalang ha Nongstoiñ, kadei ka jingsdang jong ka bynta kaba ar ha ka jingleit pynshai sha ki paidbah halor ka jingdonkam ban pynkylla ïa ka Reservation Policy ne ka Polisi bhah kam bad kumjuh ruh ka jingpyntreikam ïa ka Roster System. Ha ka 4 tarik mynta u bnai ka Seng kan pynlong ïa ka jingïalang ha Nongpoh bad ka 10 tarik pat ha Mawkyrwat. “Hadien kine ki jingïalang, ngin sa shong pyrkhat ban pynbna noh ïa ki jingïakhih kiba tyngeh, lada sorkar kam sngap ïa ki jingdawa jong ngi”, la ong u Bah Ardent ha kane ka jingïalang.
U nongïalam ka VPP, u la pynshai ïa ki paidbah balei ba ka Seng ka hap ban mih sha surok na ka bynta kane ka mat kaba la ktah shikatdei eh ïa ki Samla ha ka jingïohkam ïoh jam. U la ïathuh ba ki saw ngut ki MLA ki la rah ïa kane ka mat ha Assembly, hynrei kim shym la ïoh lad ban kren. Hynrei la shu ïoh lad ban kren tang ha ka por ba ïatai ïa ka mangtyngka jong ka jylla bad kata ruh la aipor tang shiphew minit ban kren. “Kumba ngi la buh ha ka jingkular mat elekshon bad ngi la kren ruh ha ka por ba ïalap elekshon ban pynkylla ïa ka Reservation Policy, hynrei haba ngim ïoh lad ban kren, ngi wan sha phi u paidbah, namar ka VPP kam dei ka Seng kaba mih tang ban shu ïaleh elekshon”, la ong u Bah Ardent.
Ha kane ka jingïalang kaba la wan sakhi ruh da ki spah ngut ki paidbah, u Bah Ardent u la pan ïa ka jingkyrshan ki paidbah da kaba phah rah kti kum ka dak ka jingkyrshan ïa ka VPP ban pynlong ki jingïakhih lada ka sorkar kam sngap ïa ki jingdawa ka Seng ban pynsangeh shuwa ka thungkam thungjam, katba ym pat lah ban pynbeit ïa ka Reservation Policy bad ka jingbuh por ba thikna ïa ka jingpyntreikam ka Roster System kumba la bthah da ka ïingbishar ba dei ka sorkar bad ka Assembly ki ban rai ïa kane ka kam.
Ha ka jingrah kti ki paidbah ban pynpaw ka jingkyrshan, u Bah Ardent u la ong ba ai ba kane ka jingkyrshan kan long ka khubor sha u Myntri Rangbah u Conrad Sangma, u Symbud Myntri Rangbah, u Bah Prestone Tynsong ba kin hap ban sngap ïa sur u paidbah uba kwah ban pynkylla ïa ka Reservation Policy.

Leave A Reply

Your email address will not be published.