Kyntait ki nongïalam ba la khylliap lama ïa ka PDF, kam u CM ka jingïakren ka dang ïaid

Shillong, Jymmang, 02: Ka Central Executive Committee (CEC) jong ka People Democratic’s Front (PDF) ka la kyntait mardor halor ka khubor ba yn sa khylliap lama noh ïa kane ka seng saiñpyrthei ha kane ka jylla bad ban leit pynïasoh pura sha ka National Peoples Party (NPP).
U President bad u Working President jong ka PDF u Bah Gavin Mylliem bad u Bah Banteidor Lyngdoh ki la kyntait ban ïathuh sha ki lad pathai khubor ïa ka rai kaba ki la shim ha ka jingïalang jong ka CEC.
Haba kylli, u Bah Banteidor Lyngdoh u la ïathuh ba ka jingïakren bad ki nongïalam ka NPP ka long manla ka sngi.
“Phin sa tip ïa ka khubor kaba sngewtynnat ynda la ngi pyntip sha phi,” la ong u Bah Gavin Mylliem.
Shwa kane, u National President jong ka NPP u Conrad Kongkal Sangma uba long ruh u Myntri Rangbah jong ka Jylla ha ka jingïakren bad ki lad pathai khubor ula ong, “ngi la don ka jingïakren bad ki (nongïalam ka PDF) bad ngi la kren sani bha ha kaba ïadei bad ka jingwan pynïasoh jong ki.”
“La pyntip ïa nga ba ka PDF ka la shong ïa ka Central Executive Committee katba ngi dang ïakren mynta…..bad hadien kata ngin sa shong ïa ka General Council bad nga tharai ba ki nongïalam ka PDF kin sa pyntip sha ngi ynda la biang ka por halor ka rai kaba kin sa shim,” u la bynrap.
Haba kylli, hato ka don neem ka jingkular ïa ki MLA jong ka PDF ban ai shuki Myntri, u Sangma u la ong, “kumba ka long mynta ngi dang ïakren halor kane ka kam bad ngi dang ap ïa ka rai ba kin sa shim bad hadien kata ngin sa shim pat ïa ka rai kumno ban ïaid shakhmat.”
Ka PDF ïa mynta ka don tang arngut ki MLA kata u Bah Banteidor Lyngdoh na Mawkynrew bad u Bah Gavin M Mylliem na Sohra.
Dang shen u Bah Banteidor uba long u Working President jong ka PDF u la ïathuh ba ka party kan sa shim ïa ka rai ha ka por kaba biang.