Shillong, Jymmang, 02: Ka Meghalaya State Commission for Women (MSCW) ha ka sngi Baar ka la kular ba kan leh eiei katkum ka iktiar ba la pynkupbor khnang ba ka jingtohkit halor ka jingkhladnoh jong ka samla Walinda Binong ha ka 27 tarik u bnai baladep ha ka jaka pule ha Mody University, Rajasthan.
“Ka Meghalaya State Commission for Women ka phah ïa u kyrwoh sngewlem sha ki bahaing hasem jong ka (L) Walinda Binong. Ka jingïap jong kino kino ki khynnah samla, kino kino ki samla kynthei, ka dei ka jingjia kaba sngewsih kthang. Kaba kham pynsngewkhia ka long halor ki jingjia kaba lam sha ka jingduhei ka jingim jong kane ka samla kynthei. Kane ka jingjia ka pynpaw ïa ka jingshah thombor ba la mad ki longkmie bad ki kynthei, manla ka sngi,” ong u kyrwoh ba la phah da ka Member Secretary jong ka Meghalaya State Commission for Women ka Kong VH Blah.
Ka Commission ka la pynpaw ba kan sa leh katba don la ka iktiar ba la pynkup khnang ban pynthikna ba ka jingtohkit kaba bniah halor kane ka jingjia ka dei ban ïaid shakhmat bad ban pynïoh ruh ïa ka hok.
Ïa ka met jong ka samla Walinda la thang donburom ha ka 1 tarik mynta u bnai ha ka shnong Marngar, Ribhoi District.
Kum ban shu pyntip hangne, ka jingïap syndet jong ka samla Walinda Binong ka la pynshaïong ngaiñ ïa ka ïing ka sem, ïa ka shnong ka thaw bad ïa ki baïeid ba thoiñ baroh, kiba dang sah haduh mynta ha ka umdum bad kaba long ruh tang kum ka jingphohsniew ïa ka kmie bad ïa u kpa bad kawei ka hynmen kynthei. Kat haduh mynta, ki kmie ki kpa bad ki bahaing hasem kim pat lah satia ban ngeit ba ka khun jong ki kam don shuh ha kane ka sla pyrthei.
U Bah Michael Binong uba long u kñi Rangbah jong ka kur Binong u la ong ba ka kur Binong ka dawa ïa ka Sorkar Jylla bad kumjuh ruh ka Sorkar Rajasthan ba kin shimkhia ïa kane ka kam ban pynlong ka jingtohkit kaba bñiah watla dei ban aiti sha ka Central Bureau of Investigation (CBI) khnang ban ïoh ïa ka jingbishar kaba hok.
