Shillong, Jymmang 02 : U Myntri Rangbah ka Jylla Conrad K Sangma mynta ka sngi ula pyntip ba ka Sorkar Jylla kan sa sdang ïakren bad ïa phylliew jingmut bad ki kynhun bapher bapher kynthup ki seng saiñ pyrthei halor ka jingpyntreikam ïa ka Roster System hadien jong ka 15 tarik u Jymmang kata hadien ba la kut ka election MLA ha Sohiong Constituency.
`Haba ïakren bad ki nongthoh khubor, u Conrad ula ong ba ka Sorkar ka la ïoh ïa bun ki jingbatai na ki Tnad bapher bapher halor kane ka kam bad ka Kynhun Myntri ka dang bishar ïa kine baroh bad ka jingïakren bad ki kynhun bapher bapher kynthup ki seng saiñ pyrhtei kan sa long hadien ka 15 tarik Jymmang.
“Ngin sa khot lang ïa baroh. Ngi don jingmut ban khot ïa baroh ki dkhot ka MDA, baroh ki seng saiñ pyrthei, baroh ki kynhun sengbhalang na ki thaiñ bapher bapher bad kiwei kiwei ki kynhun ba kongsan kynthup ia ki Nongïalam Niam namar ka dei kaei kaei kaba ngi sngew ba baroh ki dei ban ïa don bynta lang bad ban sngewthuh ïa baroh ki jingshisha” ula ong.
“Kumta hadien ka 15 tarik Jymmang, kine ki jingïalang kin sa sdang ha ka kyrdan ka Sorkar Jylla bad kumjuh ruh ha ki kyrdan jong ki District haba donkam” ula bynrap.
